Белгилисича, россейли спортчуланы тюрлю-тюрлю халкъла аралы эришиулеге къатышыр онглары жокъду. Бу кюнлеге дери ол чекле Олимпиада оюнла бла да байламлы эдиле. Алай бу кюнледе Халкъла аралы Олимпиада комитетни таматасы Томас Бах бизни атлетле анга къатышыргъа боллукъдула дегенди. Алай аллай амал аланы бир къауум жорукъларына бой салгъандан сора берилликди.

Сёз ючюн, Россейли властьны энчи аскер операция бла байламлы политикасы жанлы болгъан бир спортчуну да Оюнлагъа къатышыр онгу жокъду. Андан сора ЦСКА-да бла Росгвардияда къуллукъда болгъанла да ол халли. Дагъыда ала нейтральный атлетлеча кёргюзтюллюкдюле. Спортну командалы тюрлюлерине да ала къатышыргъа эркин тюйюлдюле. Бу жорукъла белоруслу атлетлеге да жайыладыла. Андан сора да Оюнлада эки къыралны байракълары бла гимнлери да согъуллукъ тюйюлдю.

Алай Томас Бах белгилегеннге кёре, битеу бу жорукъла 2026 жылдан сора ишлерикдиле. Ары дери Францияда бардырыллыкъ Жай Олимпиада оюнлагъа бла 2026 жылда Миланда ётерик Къыш оюнлагъа спортчуланы бу жолгъа дери белгили болгъан жорукълагъа таяна жиберликдиле.

Халкъла аралы Олимпиада комитетни бу оноуу Россейде кёплени чамландыргъанды. Кёпле бу Оюнлагъа къатышыудан кенгде турургъа чакъырадыла. Нек дегенде быллай тюрлю жорукълагъа бой салыу айыпды, деп белгилейдиле ала.

Къасымланы Аминат.