КъМР-ни Башчысы Казбек Коков районланы бла шахар округланы администрацияларыны башчылары бла кезиулю «муниципал сагъатны» бардыргъанды. Анда аскерчилерибизге болушлукъну тап къурауну эмда миллет проектлени толтуруу къалай баргъаныны юсюнден сёлешиннгенди.
Жыйылыуда белгиленнгенича, Къабарты-Малкъардан энчи аскер операциягъа къатышханлагъа болушуу къыстау барады.Гуманитар жюкле жиберилгенлей турадыла. Муниципалитетлени башчылары бла жамауат биригиулени келечилери бизни жашларыбыз къуллукъ этген жерлени жокълайдыла.
«Мен кёп болмай баргъанымда, аскерчилерибиз этген тилекле толтурулгъандыла, ол санда къыйын жолладан ётерге боллукъ автомобильле да жиберилгендиле»,- деп билдиргенди Казбек Коков. Ол аскерчилени юйюрлерине къайгъырыуну да бек магъаналыгъа санагъанды.
Ушакъны кезиуюнде миллет проектле бла байламлы келишимле этиу не халда болгъанына къаралгъанды. Быйыл къурулуш эмда ремонт ишлени тизмесине 150 чакълы объект къошулгъанды. Ала асламысында социал учрежденияладыла, коммунал эмда жол инфраструктурады. Келишимле этиу бошала турады, кёп объектде къурулушчула ишни къолгъа алгъандыла.
Жыйылыуда дагъыда эллени тазалау, ЖКХ-ны объектлерин жангыртыу бла байламлы борчла белгиленнгендиле, башха магъаналы жумушла да сюзюлгендиле.
КъМР-ни Башчысыны бла
Правительствосуну пресс-службасы.