Iуащхьэмахуэ и Iэгъуэблагъэм щынэхъ цIэрыIуэхэм ящыщщ мывэм къыхэщIыкIа Iэгъэбэгу абрагъуэхэр зытет тафэр.
Алатырь бгым метр 3250-кIэ удэкIуея нэужь иIэ тафэм мывэм къыхэщIыкIауэ Iэгъэбэгу 20-м нэс щызэхэтщ. Абы и хъуреягъыр мывэкIэ къэщIыхьащ, и ищхъэрэ лъэныкъуэмкIэ дэкIыпIэ иIэщ, Сирх бгым екIуалIэу. ЛIэщIыгъуэ куэд хъуауэ зыплъыхьакIуэхэм ягъэщIагъуэ абыхэм я инагъымрэ я теплъэ телъыджэмрэ. Ахэр зытет тафэр инкъым: метри 100 и бгъуагъыу, метр 250-рэ и кIыхьагъыу аращ.
Мы щIыпIэм къаруушхуэ иIэщ: электрон Iэмэпсымэхэр щылажьэркъым, сыхьэтхэр къыщоувыIэ. Дунейм и щытыкIэри щыгъэщIэгъуэнщ абдеж - куэдрэ плъагъунущ ихъуреягъкIэ уэшх къыщешхыу, жьапщэу, ауэ Iэгъэбэгухэм я тафэм дыгъэшхуэ къыщепсу.
Мы щIыпIэм йогхэр «Кавказым щыIэ ШамбэлэкIэ» йоджэ. Тафэм цIыхур пIейтеиншэ, гузэвэншэ щохъу, и гум зыщегъэпсэху. Языныкъуэхэм мыбы фIэщщIыгъуей телъыджэ куэд щалъагъу. ЗэрыжаIэмкIэ, мы щIыпIэм пасэ зэманым къурмэн щащIу щытащ. Абы нэмыщI, мы мывэхэм утегъуалъхьэрэ утелъмэ, узыр пщхьэщыкIыу жаIэ. Нэхъ ищхьэмкIэ щыIэ Iэгъэбэгухэм я щхьэ пIащIэхэм узыIэпашэу къыпщохъу, удэкIуеймэ занщIэу зыхыбощIэ къабгъэдэкI хуабагъыр. Нэхъ ищIагъыIуэмкIэ укъехмэ, нэгъуэщIщ - абдеж щызэхэт Iэгъэбэгухэм я щхьэм удэ- кIуея нэужь зыхэпщIэр щIыIэщ.
Мывэм къыхэщIыкIа Iэгъэбэгухэм я щхьэр вулкан диижащ. ЗыплъыхьакIуэхэм нэмыщI мы щIыпIэр щIэныгъэлIхэми яфIэгъэщIэгъуэну ядж.
БИЦУ Жаннэ.