РФ-ни экономиканы айнытыу министрини орунбасары Дмитрий Вольвач Узбекистанны инновациялы эмда тыш сатыу-алыу министрини орунбасары Хуррам Тешабаев бла онлайн-халда тюбешиу бардыргъанды. Къабарты-Малкъарны атындан анга Экономиканы айнытыу министерствону регионну маркетинги эмда тыш байламлыкъла департаментини башчысы Севиль Богацкая къатышханды.

Тюбешиуде бизни къыралдан эмда Узбекистандан талай предприятияны адамлары да сёлешгендиле. Сёз транспорт, инвестицияла, нефть эмда газ, сора башха бёлюмледе байламлыкъла къурауну юсюнден баргъанды.

Дмитрий Вольвач, Хуррам Тешабаев да, эки къыралгъа хайырлы сатыу-алыу бардырыргъа бек иги онгла болгъанын белгилегендиле. Жыйылыугъа къатышханланы барын да эрттеден бери къуралгъан байламлыкъланы тирилтирге, аны бла бирге уа жангы амалла да излерге чакъыргъандыла.

Министерствода айтханларыча, Узбекистан Къабарты-Малкъар бла байламлыкъларын юзмегенди, аланы тири жюрютеди. Ахыр эки жылны ичинде арабызда сатыу-алыу ёсгенлей барады: бизни республика ары жиберген продукцияны ёлчеми 1,7 кереге кёбейгенди. Ол а ма быллай затладыла: инструментле, крахмал, ферментле, агъач эмда андан этилген абериле, чагъыр, суула эм башха затла. Узбекистандан бери уа быстырла, багъыр, мамукъ, какао келтиредиле. Арада байламлыкъланы кенгертиу иш андан ары бардырылады.

Улбашланы Мурат хазырлагъанды.