ЕгъэджакIуэмрэ унэтIакIуэмрэ я илъэсым ди гулъытэр нэхъыбэу, дауи, зыхуэгъэзар егъэджэныгъэ-гъэсэныгъэ IэнатIэ мытыншым хьэлэлу пэрытхэращ. Апхуэдэхэм ящыщщ къытщIэхъуэ щIэблэм илъэс 35-м нэсауэ яхэт, Шыд Хьэзрит и цIэр зэрихьэу Нарткъалэ дэт курыт школ №2-м (унафэщIыр Шыбзыхъуэ Иннэщ) адыгэбзэмрэ литературэмрэ щезыгъэдж Къурашэ Эммэ. ЛэжьакIуэ гумызагъэм зэфIэкIрэ къарууэ иIэр ирехьэлIэ ныбжьыщIэхэм щIэныгъэ куурэ лъэпкъ гъэсэныгъэрэ егъэгъуэтыным.
Аруан щIыналъэм хыхьэ Шэрэдж Ищхъэрэ жылэм дэт курыт школыр ехъулIэныгъэкIэ 1987 гъэм къиухри, егъэджакIуэ IэщIагъэм хуеджэну мурад зыщIа пщащэ цIыкIур щIэтIысхьащ КъБКъУ-м и тхыдэ-филологие факультетым урысыбзэмрэ урыс литературэмкIэ, адыгэбзэмрэ адыгэ литературэмкIэ и къудамэм. Студент илъэсхэр купщIафIэу, Iуэхугъуэ хьэлэмэтхэмкIэ гъэнщIауэ ирихьэкIащ Эммэ. Еджэныр хъарзынэу зэфIэзыгъэкIа егъэджакIуэ ныбжьыщIэр, япэм къекIуэкIыу щыта хабзэм тету, ягъэкIуащ езым хуэдэ IэщIагъэлI хуэныкъуэу къалъыта Къэхъун къуажэм дэт курыт школ №2-м, адыгэбзэмрэ литературэмрэ ныбжьыщIэхэм яригъэджыну. ИужькIэ Къурашэр зэман кIэщIкIэ щылэжьащ Псынабэ дэт курыт школми.
Эммэ игу къызэригъэкIыжымкIэ, а илъэсхэр хуэхъуащ абы икIуну Тхьэм къыхуиуха егъэджакIуэ гъуэгу кIыхьым икIи купщIафIэм, хьэлэмэтым икIи жэуаплыныгъэ зыпылъым я пэщIэдзэ дахэ. ЕгъэджакIуэ ныбжьыщIэр хуэIэижь хъуащ зыпэрыхьа IэнатIэм хэлъ щхьэхуэныгъэхэм, щIэхыу щыгъуазэ зыхуищIыфащ дерсхэр зэмылIэужьыгъуэу, гурыIуэгъуэу зэраухуэ Iэмалхэм, лэжьыгъэми къыщигъэсэбэпу хуежьащ егъэджэныгъэм къыхыхьэ технологие пэрытхэр. А псоми, дауи, я лъабжьэт Къурашэм и IэщIагъэм хуиIэ лъагъуныгъэ къабзэр, щIэблэм ядэлэжьэнымкIэ хэлъ жыджэрагъыр, иIэ гукъыдэжыр. ЖыпIэнурамэ, абы къищIыкIащ зи IэщIагъэм хуэIэзэ лэжьакIуэ IэкIуэлъакIуэ.
Нарткъалэ дэт курыт школым Къурашэр зэрыщылажьэрэ илъэс 25-м нэсащ. А зэманым къриубыдэу абы зыкъигъэлъэгъуащ IэщIагъэлI гумызагъэу, зыпэрыт IэнатIэр егъэфIэкIуэным, лэжьэкIэ мардэщIэхэр Iуэху зехьэкIэм хэгъэхьэным гурэ псэкIэ хущIэкъу егъэджакIуэу, щIэблэм я унэтIакIуэу. Бгъэдэлъ щIэныгъэм, зэфIэкIхэм адэкIи хигъэхъуэн мурадкIэ, Эммэ зэкъым-тIэукъым зэрыщыIар а Iуэхугъуэхэм хуэгъэпса курсхэм. Нобэ ар квалификацэ лъагэ зиIэ егъэджакIуэщ, зи лэжьэкIэр куэдым щапхъэ яхуэхъу нэхъыжьыфIщ.
- Къурашэ Эммэ ящыщщ ди анэдэлъхуб-зэр хъумэным, и IэфIыр зыхащIэу, ар яIурылъу щIэблэр къэгъэтэджыным гурэ псэкIэ хущIэкъухэм. Абы и щыхьэтщ ари и нэIэм щIэт еджакIуэ цIыкIухэри адыгэбзэмкIэ, лъэпкъ литературэмкIэ Нарткъалэ, Аруан щIыналъэм, республикэм къыщызэрагъэпэщ олимпиадэхэм, нэгъуэщI зэпеуэ зэмылIэужьыгъуэхэм жыджэру дапщэщи зэрыхэтыр, ехъулIэныгъэфIхэр къызэрыщахьыр, - жеIэ школым адыгэбзэмрэ литературэмрэ щезыгъэджхэм я методикэ зэгухьэныгъэм и унафэщI Жыласэ Заремэ. - Я IэнатIэмкIэ зыхащIэ жэуаплыныгъэ лъагэмкIэ, IэщIагъэм хуаIэ лъагъуныгъэ къабзэмкIэ ди егъэджакIуэхэм къапэхъун куэд щымыIэу къызолъытэ. Лэжьыгъэм и пIалъэ фIыуэ зыщIэ ди нэхъыжьыфIхэм дрогушхуэ, дропагэ.
ЕгъэджакIуэм и дерсхэр, зэрихабзэу, еухуэ щIэщыгъуагъ хэлъу, сабийхэр нэхъыфIу лэжьыгъэм езышэлIэн Iэмалхэр, технологиещIэхэр, техникэ пэрытым иIэ зэфIэкI къызэрымыкIуэхэр къигъэсэбэпурэ. Сабийм и анэдэлъхубзэр фIыуэ илъагъунымкIэ егъэджакIуэм и пщэ жэуаплыныгъэшхуэ къызэрыдэхуэр фIыуэ къыгуроIуэ Къурашэм. Абы зэрыжиIэмкIэ, мыхьэнэшхуэ зиIэр дерсхэр къызыхуэтыншэу къызэгъэпэщыным и закъуэкъым, атIэ, анэдэлъхубзэмкIэ классщIыб лэжьыгъэхэри зэмылIэужьыгъуэу егъэкIуэкIыпхъэщ. АпхуэдэхэмкIи къулейщ Эммэ. Абы ирегъэкIуэкI лъэпкъ хабзэхэмкIэ факультатив курсыр. Апхуэдэу ди адыгэ тхакIуэ, усакIуэ цIэрыIуэхэм я махуэщIхэм, махуэгъэпсым къыщыгъэлъэгъуа лъэпкъ махуэшхуэхэм ирихьэлIэу школым къыщызэрагъэпэщ зэхыхьэхэм жыджэру хэтщ езыри и еджакIуэхэри. Дауи, егъэджакIуэ гумызагъэм иригъэкIуэкI апхуэдэ Iуэхухэм ныбжьыщIэхэм яку дэлъыпхъэ зэхущытыкIэхэр, пщIэмрэ нэмысымрэ ирегъэфIакIуэ, абыхэм ягъуэт лъэпкъ гъэсэныгъэм и хэлъхьэныгъэ мэхъу.
ЗэрыгурыIуэгъуэщи, дэтхэнэ егъэджа-кIуэм и дежкIи мыхьэнэшхуэ иIэщ и гъэсэнхэм и предметым къыхуащI гулъытэмрэ пщIэмрэ. АбыкIэ гурыфIыгъуэ щыщIэркъым Къурашэр. Абы и еджакIуэхэм яхэтщ район, республикэ олимпиадэхэм адыгэбзэмкIэ пашэ щыхъуахэр, «Си бзэ - си псэ, си дуней» республикэпсо фестивалым и лауреат хъуахэр.
- Сабийхэм яхэт дэтхэнэ лэжьакIуэми илъагъуну зыщIэхъуэпс фIыгъуэ нэхъыщхьэхэм ящыщщ иригъаджэхэм езыми и предметми пщIэ къыхуащIыныр. Сэри сыхущIокъу си бзэм, си IэщIагъэм хузиIэ лъагъуныгъэ иныр щIэблэми зэрызыхезгъэщIэным, ахэри анэдэлъхубзэм, щалъхуа я щIыналъэм гурыщIэ къабзэ хуаIэу къэгъэтэджыным, - жеIэ егъэджакIуэм. - Си гъэсэнхэм я ехъулIэныгъэращ си лэжьыгъэм нэхъыбэу джэлэс хуэхъур, си лъэр нэхъ жану щIэзыгъэкIыр.
Апхуэдэу, и гуи и пси етауэ, лэжьыгъэр ирехьэкI Къурашэ Эммэ. Абы къыщыдэхуэ зэманым щыщ бзылъхугъэм хухех фIыуэ илъагъу литературэм. Къыхэдгъэщынщи, Къурашэм къыдэкIыным хуигъэхьэзыращ и къалэмыпэм къыпыкIа тхылъитI: «Анэм и нэпс», «ГъащIэм и тезыр». Абыхэм авторыр шэщIауэ щытепсэлъыхьащ КъБР-м и телевиденэм къыщыхузэрагъэпэща нэтын щхьэхуэм. Эммэ и тхыгъэхэр щIэх-щIэхыурэ къытохуэ республикэм къыщыдэкI газетхэм.
Егъэджэныгъэ-гъэсэныгъэ IэнатIэм ехъулIэныгъэфIхэр щызыIэрызыгъэхьэ, къытщIэхъуэ щIэблэм щIэныгъэфIрэ гъэсэныгъэ тэмэмрэ егъэгъуэтыным гулъытэшхуэ хуэзыщI, ди щIыналъэм щекIуэкI жылагъуэ гъащIэм жыджэру хэт лэжьакIуэ пашэм бгъэдэлъ зэфIэкIхэм гулъытэ лъаги ягъуэтащ. Къурашэм къыфIащащ «УФ-м и егъэджэныгъэ IэнатIэм щIыхь зиIэ и лэжьакIуэ» цIэ лъапIэр, къыхуагъэфэщащ КъБР-м и Парламентым, Аруан район администрацэм, Дунейпсо Адыгэ Хасэм, нэгъуэщI къэрал, жылагъуэ IэнатIэхэми къабгъэдэкI щIыхь, фIыщIэ тхылъхэр.
И лэжьыгъэм къыпэкIуэ апхуэдэ ехъулIэныгъэфIхэм, и гъэсэнхэм я текIуэныгъэхэм, жылагъуэм щиIэ пщIэм, дауи, ирогушхуэ егъэджакIуэр. АтIэми гъащIэм щиIэ гурыфIэгъуэ нэхъ ин дыдэщ абы и бынитIыр: Мухьэмэдрэ Дианэрэ. Ахэр лъэпкъ хабзэмрэ нэмысымрэ зыхэлъ цIыху гъэсащ, щIэныгъэ нэхъыщхьэрэ IэщIагъэ дахэрэ яIэщ, цIыхухэм екIуу яхэтщ.
Уи IэщIагъэр фIыуэ плъагъумэ, пхузэфIэмыкIын хэлъкъым, куэди пхузэгъэхъулIэнущ. Абы и щыхьэтщ Къурашэ Эммэ и Iуэху зехьэкIэ дахэр. Аращ абы егъэджакIуэм и къалэн нэхъыщхьэм - щIэныгъэфI зыбгъэдэлъ, цIыхугъэ ин, хабзэ, нэмыс зыхэлъ цIыху тэрэз хэкум хуэгъэхьэзырыным - хуэгъэпса и мурадхэр къыщIехъулIэр. ЩIэблэм анэдэлъхубзэр егъэджыным, хэкупсэу гъэсэным псэ хьэлэлу пэрыт егъэджакIуэ Iэзэм, гъащIэм жыджэру хэт бзылъхугъэм ехъулIэныгъэщIэхэр иIэну ди гуапэщ. Угъурлы хурехъу ЕгъэджакIуэмрэ унэтIакIуэмрэ я илъэсыр.
ТАМБИЙ Линэ.