Сюд приставланы Федерал Службасыны КъМР-де Управлениясы былтыр ишини эсеплерин чыгъаргъанды. 
Ала бла журналистлени ведомствону башчысы Бауаланы Ахмат шагъырей этгенди. 

Республиканы сюд  приставлары инсанланы эркинликлерин бла законлу излемлерин сакълау мадарлагъа баш магъана бергенлерин чертгенди Ахмат  Каллетович, тюбешиуню ача. «Сюдню борчну тёлетиу жаны бла оноуларын толтуруу низамны, сюдледе къоркъуусузлукъну жалчытыуну, жууаплылыкъларыбызны чеклеринде соруу-тинтиу жумушланы игилендириу жаны бла мадарла толтурулгъандыла», – дегенди ол.

Битеу тамамланнган ишни хайырындан а приставла былтыр борчлары болгъанладан  4,9 миллиард сомну   жыйгъандыла. Битеу да бирге уа ведомствону къуллукъчулары 1,2 миллион толтуруу бегимни сюзгендиле. Сёзге, былтыр  борчлары болгъанладан 3,7 миллиард сом жыйылгъан эди. Бу жаны бла тарихле 29,7 процентге кёбейтилгендиле. 

Толтуруу бегимлени асламы жолда жюрюуню жорукъларына бузукълукъла бла байламлыдыла. Былтыр аланы  саны 274 мингнге  жетгенди. Жолда жюрюуню низамын сакъламагъанлары ючюн тазир салыннганладан 192 миллион сом жыйылгъанды. Аны аллында жылда – 170 миллион сом. «Жолгъа кеф болуп чыкъгъан водительледен 11 миллион сом жыйылгъанды. Бу жаны бла ишни игилендирир мурат бла Ич ишле министерство бла бирге байламлыкъла къурауну юсюнден келишим этилгенди. Полициячыла бла рейдле бардырыладыла. Бу жумушла уа низамлыкъны жалчытыргъа, жолда жюрюуню жорукъларына бузукълукъланы азайтыргъа себеплик этедиле», – деп белгилегенди Бауаланы Ахмат.

 Айлыкъны ишчилеге тёлемей, борч жыйылгъан кезиулени да тамамлагъандыла сюд приставла. Ведомствону оноучусу айтханыча,  айлыкъларын алалмай тургъан  инсанлагъа  8,1 миллион сом  къайтарылгъанды. «Ахыр тёрт жылны ичинде уа айлыкъ ючюн борчну 16 кереге азайтыргъа къолдан келгенди. Быллай жетишимле прокуратура бла бирге тамамланнган жумушланы хайырындан болдурулгъандыла. Аны башламчылыгъы  бла ведомствола аралы ишчи къауум ишлейди», – дегенди ол.

Сабийлени эркинликлерин жалчытыу приставланы баш борчларындан бириди. Былтыр ата-аналыкъ борчларын толтурмай, сабийлерин кечиндирирге ахча тёлемегенледен 322 миллион сом жыйылгъанды. Аны аллында жыл – 242 миллион сом. Бауаланы Ахмат айтханыча, ахчаны тёлетгенде, приставла тюрлю-тюрлю законлу амалланы хайырланадыла. Ол санда банкда счётха  арест салынады, айлыкъдан тыйылады. «Алай бла уа инсан борчундан къутулалмазлыгъын ангылайды», – деп къошханды ол.

Ёксюз, къарар адамлары болмагъан сабийлени къауумундан инсанланы жашау журтла бла жалчытыугъа  да приставла энчи эс бурадыла. Жарыкъландырыу эм илму министерство бла байламлыкъда ишлеп, былтыр бу къауумдан 37  инсаннга фатарла берилгендиле. Жылны аллында быллай толтуруу бегимлени саны 276-гъа жетгенди. Тийишли мадарла толтурулуп, ала 239-гъа дери азайтылгъандыла. 

Льготалы дарманла бла жалчытыу иш да къуралыулу бардырылады. Сюдню инсаннга дарман берилирге кереклисини юсюнден оноулары барысы да толтурулгъандыла. 

Сюдню кезиуюнде низамлыкъны жалчытыу иш бийик даражада толтурулгъанды. Битеу да бирге 25 минг сюдню жыйылыуунда законлукъ жалчытылыннганды, алада бузукълукъла этилмегендиле. Сюдге зор бла 4 минг инсан жетдирилгенди. Жыйылыулада   низамны бузгъанлары ючюн 1,1 минг адам административ жууапха тартылгъандыла.  

– Управленияны къуллукъчулары тамамлагъан мадарла регионда  тёлеу низамлыкъны игилендиредиле, аны бла бирге уа инсанланы социал излемлерин жалчытадыла. Приставла мындан ары да сюдню оноуларын толтурургъа, инсанларыбызны, жамауатны сейирлерин сакъларгъа хазырдыла, – дегенди ол.

Тюбешиуде сёз «Жумушланы телефон бла тамамлау къауумну» ишини юсюнден да баргъанды. Управленияны къурау-контроль иш, документле бла жалчытыу эм инсанланы тилеклерин тинтиу жаны бла бёлюмюню башчысыАбдуллаланы Алийни айтханына кёре, къауум  къуралгъанлы эки жыл озгъанды. Былтыр а анга инсанладан 15 мингден аслам тилек бла тарыгъыу берилгендиле. 

 - Ол инсанланы сорууларына жууапла берир, законланы ангылатыр мурат бла къуралгъанды. Соруулагъа жууапланы сынаулары бютюнда уллу болгъан приставла бередиле. Алагъа сёлешип,  борч болгъанын бла къалгъанын билирге боллукъдула. Сорууланы асламы тёлеу низам бла байламлыдыла, – дегенди ол.

Былтыр а УФССП-ны Нальчикде бёлюмюнде Бирикдирилген ара къуралгъанды. Аны жумушлары бла республиканы районларында жашагъан, алай ишге уа Нальчикге келген инсанла хайырланыргъа боллукъдула. «Приставлагъа соруулары болгъанла ишчи заманда районнга барып, жумушларын тамамлаялмайдыла. Болсада алагъа энди аллай онг Нальчикде къуралгъанды», – дегенди ол.

Ызы бла журналистлени приставлагъа соруула берирге онглары болгъанды. Сёз алиметлени, жашау журт-коммунал мюлк ючюн борчланы, айлыкъны, тёлеу низамлыкъны игилендириуню юслеринден баргъанды.  

Тюбешиуге УФССП-ны толтуруу бегимлени хазырлау, излеу, борчлары болгъанланы мюлклерин сатыу жаны бла бёлюмюню башчысы Хусен Танашев, сюдню кезиуюнде  низамлыкъны жалчытыуну бёлюмюню таматасы Алексей Свистунов да къатышхандыла.

Тикаланы Фатима.