Котляровхэ Викторрэ Мариерэ я тхылъ тедзапIэм иджыблагъэ къыщыдэкIащ усакIуэ цIэрыIуэ Кулиев Къайсын и IэдакъэщIэкIхэр зэрыт тхылъыщIэ. 

- Сэ сызэреплъымкIэ, мыр ди щIыналъэм дежкIэ мыхьэнэшхуэ зиIэ Iуэхущ, - жеIэ Котляров Виктор. – Том 13 хъууэ зэкIэлъыкIуэну къыдэкIыгъуэм щыщу 12-м Къайсын и IэдакъэщIэкIхэр итынущ, епщIыкIущанэр абы и тхыгъэхэм хэзыгъэгъуазэу дыщIыгъужынущ.
Ар зэхагъэуващ усакIуэм ипхъу Кулиевэ Жаннэ, филологие щIэныгъэхэмкIэ докторхэу Кучуковэ Зухрарэ Тетуев Борисрэ. Тхылъым и редакторыр Темукуев Борисщ.
Къыхэгъэщыпхъэщ а зи цIэ къитIуахэм къызэрымыкIуэу лэжьыгъэшхуэ зэращIар. КъыдэкIыгъуэм тхакIуэм и IэдакъэщIэкIхэр балъкъэрыбзэрэ урысыбзэкIэ итщ.
Абы усакIуэм нэхъ пасэу и Iэдакъэ къыщIэкIа усэхэр, зауэ зэманым итхахэр, хэкум ирахуахэм ятеухуахэр пIалъэкIэ зэкIэлъыхьауэ къыщокIуэ.
Япэ къыдэкIыгъуэм къызэщIеубыдэ усакIуэм 1934-1945 гъэхэм и Iэдакъэ къыщIэкIа сатырхэр. «Кулиев Къайсын и усыгъэ дунейр» фIэщыгъэм щIэту тхылъым псалъэпэ гъэщIэгъуэн хуитхащ Кучуковэ Зухра. Тхылъым хэзыгъэгъуазэр бзитIкIэ зэрызэрадзэкIам и фIыгъэкIэ узыхуейр тыншу къыщыбогъуэтыф. 

Тэрчокъуэ Дисэ.