Быйыл Къабарты-Малкъарда жолланы жангыртыу жаны бла аслам ишле этиле баргъанына сёз да жокъду. Кесибиз кёребиз, шахарланы бла эллени кёп къалмай барында да эски жоллагъа ремонт этиу, жангыларын ишлеу да тири баргъанын. Анга кёп организацияланы специалистлери къатышадыла: бирлери асфальт жаядыла, башхалары белгиле бла бордюрла орнатадыла, орамла кече чыракъла бла жарытылырча этедиле. Дагъыда кезиулю жумушланы тамамлаучула: ууакъ ремонт этиучюле, жолланы юслерин, жанларын да кырдыкдан бла кир-кипчикден тазалаучула – аланы къыйынларын да белгилемей болмайды.

Къыш келирге алай кёп да къалмагъанлыкъгъа, жер-жерледе иш энтта да тири барады. «Къоркъуусузлу качестволу жолла» деген миллет проектни чеклеринде, талай элледе социал объектлеге, спорт учреждениялагъа элтген жолланы жангыртыу жаны бла мадар этиледи, дейдиле КъМР-ни Транспорт эмда жол мюлк министерствосунда.

Сёз ючюн, алгъаракълада Бызынгыда орта школгъа эмда сабий садикге баргъан жолгъа асфальт жайгъандыла. Ток ызла тартып, чыракъла да орнатхандыла. 
Огъары Курпда стадионну аллында орамгъа да ремонт этиле турады, Псыхурей элде физкультура-саулукъландырыу комплексге элтген жолда ишлени уа специалистле бошалгъандыла: асфальт жайгъандыла, тротуарланы жарашдыргъандыла, бордюрла да салгъандыла. Жаяу жюрюгенлеге деп энди анда светофор да ишлейди. Школну, сабий садны, амбулаторияны къатларында уа къоркъуусузлукъну излемлерин толтура, буруула орнатхандыла. Герменчикде, Шордаково элде да быллай ишле этилгендиле.

Кёпюрлеге ремонт этиу да барады. Бу кюнледе жол къурулушчула Булунгу таба баргъан трассада аллай беш объектде мадар эте турадыла. Алада бетон ишле бла кюрешедиле, кёпюрлени мурдорларын, тёгерек-башларын да кючлендиредиле. Бирлеринде уа асфальт жайып, буруула да орнатхандыла.

Жоллада кезиулю жумушла да таркъаймайдыла. Ишчиле чунгурланы жамайдыла, кырдыкдан, кир-кипчикден тазалайдыла, зыгъыр-юзмез жолланы да грейдерле бла къырып тюзетедиле.

Сагъынылгъан миллет проектни хайырындан ахыр жыллада республикада 56 элге баргъан жоллагъа ремонт этилгенди. Ол бары да 225 километр болады. Жаланда быйыл битеуда 60 километр жолла жангыртылгъандыла. Алай ишле энтта да барадыла.

Улбашланы Мурат хазырлагъанды.