Мобилизациягъа тюшгенлеге эмда аланы юйюрлерине кредит каникулла бериу жаны бла федерал закон кючюне киргенди. Дагъыда ипотека тёлеулени болжаллы халда тохтатыргъа эркинлик да берилгенди. Бу амалла бла къалай хайырланыргъа боллугъун ангылатыргъа сюебиз.

 Кредит каникул неди?

 Инсаннга болжаллы халда кредитни тёлемей тохтаргъа эркинлик бериледи. Ол жаны бла льгота законда белгиленипди. Быллай онг потребитель  кредитге, ипотекагъа да тохташдырылады. Жаланда кредит келишим мобилизация башланнган кезиуге, неда энчи операциягъа къатышхан кюннге дери къабыл кёрюлюрге керекди.

Кимге бериледи?

Мобилизация чакъырыу бла аскерге баргъанлагъа, контракт бла РФ-ни Сауутланган кючлеринде неда Росгвардияда къуллукъ этген аскерчиле. Бу амал бла кеслерини ыразылыкълары бла къуллукъ этерге баргъанла да хайырланыргъа боллукъдула. Дагъыда бу себепликни МЧС-ни къутхарыучу аскерчи бёлюмлерини, ФСО-ну, ФСБ-ны къуллукъчулары да алыргъа боллукъдула (1996 жылда 31 майда чыгъарылгъан 61-ФЗ номерли законнга тийишлиликде).

 Каникулла белгиленнген къуллукъчуланы юйюрлерине да тохташдырылады: юйдегисине, акъылбалыкъ болмагъан сабийлерине (ала очно халда окъуй эселе, 23 жылгъа дери).

Болжалы къаллай бирди?

Контракт бла къуллукъ этген кезиуге, мобилизация баргъан неда энчи операциягъа къатышхан заманнга, анга энтта 30 кюн къошулуп. Операцияны кезиуюнде жаралы болуп, неда ауруп  стационарда багъылгъан кезиде да  сакъланады бу себеплик.

 Къалай жарашдырыргъа

Кредит каникулланы юсюнден заявление жазаргъа тийишлиди. Алай аны юсюнден банкга, микрофинанс организациягъа телефон бла сёлешип айтыргъа да боллукъду.  

Заявление бла бирге энчи операциягъа къатышханына шагъатлыкъ документлени да кёргюзтюрге керекди. Аллай онг жокъ эсе уа, кредит организация аланы Къоруулау министерстводан кеси излерге эркинди.

Каникулланы аскерчини юйюрю алагъан кезиуде  аланы жууукълукъларын билдирген документ да керек боллукъду.

Оноу къалай чыгъарылады

Банк, неда микрофинанс организация кредит каникулла берилирни юсюнден тилекни 10 кюнню ичинде тинтедиле. Ызы бла къаллай оноу чыгъарылгъанын инсанна белгили этедиле. Аладан жууап 15 кюнню ичинде келмеген эсе, каникулла заявление берилген кюнден тохташдырылгъаннга саналады.

Льгота кезиу бошалгъан кюнню билдирирге керекди банкга, ол а кредит  тёлеулени жангы тизмесин хазырлайды.

 Энчи операцияны кезиуюнде аскерчи жанын берсе, неда саулугъуна ауур заран салынып, анга 1-чи къауумну сакъатлыгъы тохташдырылса, борч толусунлай кетериледи. Ол санда юйюрю алгъан кредит да.

Тикаланы Фатима хазырлагъанды.