Вэрокъуэ Владимир и цIэр зезыхьэ КъБР-м ЩэнхабзэмкIэ и фондым къыщапщытэжащ сурэт щIынымкIэ сабийхэм пап­щIэ къызэрагъэпэща «В слове «МЫ» - сто тысяч «Я» ещанэ ­республикэ фестиваль-зэпеуэм кърикIуахэр. Ар къы­зэрагъэ­пэщащ Къэбэрдей-Балъкъэр Республикэр илъэси 100 зэры­рикъум и щIыхькIэ.

Зэхьэзэхуэм сабий 50-м нэблагъэ хэтащ. Абыхэм я нэхъыбэр КъБР-м щыIэ лъэпкъ щэнхабзэ центрхэмрэ жылагъуэ зэгухьэ­ныгъэхэмрэ щылажьэхэм я щIэблэщ.
КъэпщытакIуэ гупым хэтащ КъБР-м и СурэтыщIхэм я зэгухьэ­ныгъэм и унафэщI Къаныкъуэ Жаннэ, сурэтыщI цIэрыIуэхэу Темыркъан Геннадий, Конин Анатолий, Джанкишиев Ибрэхьим, Сурхайханов Ибрэхьим сымэ. Абыхэм къапэщылът илъэси 8-19 ныбжьым итхэм я лэжьыгъэхэм хэплъэну. Сабий художествен-      нэ школхэм я гъэсэнхэм я лэжьыгъэхэр щхьэхуэу къапщытащ. Апхуэдэу нэхъ цIыкIу дыдэхэм (илъэси 5 - 7 хъухэм) я сурэтхэми щхьэхуэу хэплъащ.
ТекIуахэр щагъэпажэ зэхыхьэр  гукъинэжу къызэрагъэпэщат. Зэпеуэр зи жэрдэмхэм адэ-анэхэмрэ егъэджакIуэхэмрэ  фIы­щIэ хуащIащ ныбжьыщIэхэм я зэфIэкIым зэрызрагъэужьым папщIэ.
Фестивалыр къызэригъэпэщащ КъБР-м ЩэнхабзэмкIэ и фонд Вэрокъуэ Владимир и цIэр зезыхьэм, КъБР-м и СурэтыщIхэм я ­зэгухьэныгъэр, «Тхылъыр фIыуэ зылъагъухэр» жылагъуэ зэгухьэныгъэр, «Урысей зэкъуэт» политикэ партыр я  дэIэпыкъуэ­гъуу.
 

Тхыгъэри сурэтри ТЕКIУЖЬ Заретэ ейщ.