(Ущие зыхэлъ тхыгъэ)

Абы и кабинетым къыщыIуащ куэд щIауэ зэса телефон къеуэ макъыр. АбыкIэ мыплъэу, и Iэ ижьыр ишийри, трубкэр къытрихащ:

- СынодаIуэ.

- Си псэм хуэдэ, кхъыIэ, къакIуэ. Си Iуэхур щIагъуэкъым, сызэрыхъур сщIэркъым… КъакIуэ, псори пхузогъэгъу…

- «Пхузогъэгъу» жыпIа? Уэ пщIэуэ пIэрэ, дахэ цIыкIу, псомкIи къуаншэр уэрауэ зэрыщытыр?!

- Сэри?

- Хьэуэ, уи анэшхуэращ!

- Си псэ…

- Сэ сыхущIыхьэркъым.

Абы трубкэр трилъхьэжри, и Iэр къытримыхыжу зымащIэрэ щытащ, къэпсэлъам и жьэр а и IэмкIэ иубыдауэ иIыгъ нэхъей.

«Езым зегъэзахуэ, - жиIэрт абы игукIэ. – Сэ сыкъуаншэ арэфу сыкъыщIригъэдзащ».

ИтIанэ, и Iэр трубкэм къытрихыжри, телефон аппаратым еплъащ, ар аргуэру къеуэну зэрыхуэмейр и нэщхъ зэхэлъым къыуигъащIэу. АрщхьэкIэ ар щымт, къуейщIейуэ и адэм пэщIэхуа щIалэ цIыкIум ещхьу.

СтIолым телъ «Ростов» тутын пачкэр къищтэри, ар еплъащ зэтIолъхуэныкъуэ фIэкIа умыщIэну мамыр дыдэу абы щыжей тутынхэм. И тхьэкIумэр иубыдри, зы кърихащ. Ар Iэзэу тетIысхьащ щIалэм и ищIагъ Iупэм, ерагъыу ищхьэ Iупэм къиIыгъ къудейуэ.

Тутыныр пигъанэри, щIалэр щхьэгъубжэм бгъэдыхьащ. Иджыпсту ар еплъурэ, аргуэру зы махуэм и гъащIэр щиухырт къалэ уэрамхэм. ДэнэкIи къалэм къыщызэтрихырт и пщыхьэщхьэнэхэр: уэздыгъэхэр къыщызэщIэнэрт псэупIэ унэхэм, кафехэмрэ тыкуэнхэмрэ я витринэхэм. ЩIэх бжьыпэр иубыдынут нэгъуэщI дунейм – жэщ дунейм.

Асыхьэтым абы и кабинетым и щхьэгъубжэ лъабжьэмкIэ уэрамым ирижащ зызылIэжу кIий «скорэр». Абы и макъым цIыху зэхэзекIуэхэр я пIэм иригъэжыхьат. А макъым щIалэр къыхигъэщтыкIащ. Епхъуэри трубкэр къищтауэ нетIэ къэпсэлъам и телефон номерыр къещып. ЗэкIэлъигъэпIащIэу трубкэм йокIие: «Алло! Алло!» АрщхьэкIэ зыми и макъ зэхихыркъым. ЩIалэм гузавэу зегъэкIэрахъуэ: «Алло! Алло!» ИкIэм-икIэжым къызэхех: «СынодаIуэ. Хэт ар?» ЩIалэм зыри жиIэркъым. «Уэху, псэущ!..» ИтIанэ, Iэмал зэригъуэткIэ гупсэхуу, нетIэ екIуэкIа псалъэмакъым пищэ хуэдэ, трубкэм жреIэ: «Уэлэхьи, пэж дыдэу, къуаншэр сэрауэ къыщIэкIынум… Къысхуэгъэгъу… Сэ иджыпсту сынокIуэ…»

Ар жиIэщ, трубкэр трилъхьэжри, и кабинетым къыщIэкIащ.

Къагъырмэс Борис.