РФ-ни эл мюлк министри Дмитрий Патрушев къырал Думаны аграр вопросла жаны бла Комитетини келечилери бла тюбешгенде, Россей Федерацияда эл мюлк производствону, агропромышленность комплексге себеплик этиуню, тюрлю-тюрлю бёлюмледе импортну алышындырыуну, эл мюлк тийрелени айнытыуну юсюнден сёлешгенди.

Министр айтханыча, урлукъ себиу иш быйыл тынгылы бардырылгъанды. Жазлыкъла 53,5 миллион гектарны аладыла, кюнню халы тап болса, тирлик да бай болуп къууандырлыкъды. Къыбыла эмда Шимал Кавказ регионлада уа тирлик жыйыу башланнганды. Бу кюнлеге битеуда 5,5 миллион тонна мирзеу жыйылгъанды. Бу ишни бардыргъан аграрийлени битеу кереклери бла жалчытыугъа да энчи эс бурулады.

Малчылыкъ, жарашдырыучу сфера, чабакъчылыкъ да айныйдыла. Аланы кёбюсюнде былтыргъы кёрюмдюле болурун сакълайдыла министерствода, бир-бирлеринде уа ёсюмню.

Бёлюмге къырал билеклик этгенини юсюнден айтханында, министр быйыл жаз башында этилген оноула къыйматлы болгъанларын чертгенди. Аланы хайырындан урлукъ себиу иш чурумсуз ётгенди, аш-азыкъ рынок да продукция бла жалчытыннганды. Ол жумушлагъа Правительство битеуда 75 миллиард сом жиберген эди. Дагъыда льготалы кредитлеге 153,7 миллиард сом бёлюрге оноу этилгенди.

Этилген мадарланы хайырындан аграрийлеге быллай кредитлени бериу тёрт кереге ёсюп, 43,4 миллиард сомгъа жетгенди. Аны предприятиялагъа берилирге боллукъ эм уллу ёлчеми уа 800 миллион сом болгъанды. Берилген ахчаны хайырындан уллу мюлклени онглары кючлюрек болгъанды. Дагъыда эл мюлк техниканы бла оборудованияны жангыртыргъа себеплик этген энчи программала да сакъланнгандыла. Ётмек бишириучюлеге, аш-азыкъла эмда семиртгичле ташыучулагъа субсидияла берилгендиле. Мал ауруула жайылмазча къошакъ халда ветеринар препаратла сатып алыннгандыла, бёлюмню «цифрагъа» кёчюрюу жаны бла да мадар этилгенди. Энди уа министерство 8,3 миллиард сом бёлюнюрюгюн сакълайды. Ол ахча сют комплексле, селекция-урлукъчулукъ арала, продукцияны тап халда сакълагъан эмда башха тюрлю объектле къурагъанда этилген къоранчланы жабаргъа жиберилликдиле.

Къырал бёлген ахчаны 60 проценти иелерине жетгенди. Къоранчланы жапхан эмда ишни айнытыргъа деп берилген субсидияланы уа – 80 проценти.

Министр айтханыча, «Эллени комплекс халда айнытыу» программа андан ары бардырылады. Быйыл аны чеклеринде 1,1 мингден артыкъ проект тамамланады. Министерство ахча асламыракъ келирча мадар эталса, регионла андан да кёп проектлерин жашауда бардырыргъа боллукъдула.

Эсге сала айтсакъ, Къабарты-Малкъарда агропромышленность комплексни айнытыугъа былтыр 2,52 миллиард сом къоратылгъан эди. Аны аслам кесеги – 2,4 миллиард - федерал бюджетден жиберилгенди, къалгъанын а республика кеси бохчасындан къошханды.

Улбашланы Мурат хазырлагъанды.