Билимине кёре сыйыБу хапарыбызда Алийланы Ахматны къызы Феридени, керти устазны, юсюнден айтыргъа излейбиз. Ол 1990 жылда Къарачай-Черкесни Гитче Къарачай районуну Учкекен элинде туугъанды. Анда орта школну бошагъандан сора Черкесск шахарда Шимал-Кавказ къырал гуманитар-технология академиягъа окъургъа киреди.
Ол жылланы Фериде былай эсгереди:
- Бизни юйде бош тургъан адам болмагъанды. Цехибиз бар эди. Уллугъа, гитчеге да табыла эди анда иш. Школну бошагъанлай, Шимал-Кавказ къырал гуманитар-технология академиягъа киреме. Ыразыма мени анда окъутхан устазлагъа. Бютюнда деканыбыз Темирболатланы Билял Исхаковичге.
Жаш адамны аллында муратлары кёпдюле. Бирин толтурургъа башхасыны къайгъысын этип тебирейди. Болсада къадар деген да бир зат барды. Ол да жашаугъа кесича оноу этеди. Бюгюн былайда тура эсенг, тамбла ол сени узакъ жерлеге элтеди, жангы жашау буюрады.
Кюнлени биринде Малкъарны сыйлы эллеринден биринден Герпегежден Алийланы Ахматны юйюне келечиле келедиле. Алай бла эки жаш адам юйюр къурап, жашап тебирейдиле. Юйде жашны анасындан сора аппасы Биттирланы Таусо, аммасы Кючмезланы Зоя да бардыла. Узакъ элден келген келинчикге ала бет жарыкълы тюбегендиле. «Балам», – демей сёлешген окъуна этмейдиле. Ариу тилли адамла. Сабийлерине бийик билим алдыргъандыла. Келинчикге да билимин ёсдюрюрге себеплик этгендиле.
Фериде 2015 жылда Къабарты-Малкъар Республиканы билим бериуде ишлегенлени усталыкъларын жангыртыуну эм билимлерин ёсдюрюуню институтун бошайды. Андан сора Герпегежни орта школунда ингилиз тилден устаз болуп ишлеп тебирейди. Педагог, окъутхандан сора да, сабийлени юйретген да этеди. Ариу юйреннген сабийни къылыгъы да ариу болады. Ахшы къылыкълы, низамлы сабий окъугъан да иги этеди.
Сабийлени билимлери иги болур ючюн Фериде Ахматовна дерсден тышында да кёп иш тамамлайды. Андан сора да, сохталарын тюрлю-тюрлю конкурслагъа да къошады. Ала бары да билимни ёсдюрюрге себеплик этедиле.
Белгилисича, билим берир ючюн адам кеси да билимли болургъа керекди. 2018 жылда ара шахар окъутуу арада «Менеджер образования: эффективный менеджмент в образовательной организации» программагъа кёре юйреннгенди. Экинчи жыл а «Педагогическое образование» ызда усталыгъын ёсдюргенди.
Кёп кере сыйлы саугъалагъа тийишли болгъанды. Аладан бир къауумун сагъынайыкъ: КъЧР-ни Асламлы коммуникацияла эм басма министерствосуну «Сюеме сени, Кавказ» эришиулени хазырлагъаны ючюн, Къарачай-Черкесни Парламентини махтаулу къагъыты бла къарачай-малкъар тилни культурасын, адет-тёресин сакъларгъа салгъан къыйыны ючюн, «Жаз башы къозгъалыу» билим бериуде 1-чи жер, XV Битеуроссей устаз конкурсда да 1-чи жер ючюн дипломла берилгендиле. «ФГОС-проверка» битеуроссей олимпиада хорлагъаны ючюн да биринчи даражалы диплом къоллу болгъанды. Фериде Ахматовна «2022 жылны эм иги устазы» битеуроссей конкурсну муниципал кезиуюнде алчыланы санына чыкъгъанды.
Махтаулу устазны окъуучулары да юлгюлюле болургъа итинедиле, аны айтханын этип, ахшы кёрюмдюле болдургъанлай турадыла.
Османланы Хыйса.
Поделиться: ЧИТАТЬ ТАКЖЕ:
|