КъМР-ни Производство, энергетика эмда сатыу-алыу министерствосундан билдиргенлерича, Герменчикде «ЭРПАК» комбинат бюгюнлюкде жетишимли ишлеген предприятияладан бирине саналады. Ол эски картондан тюрлю-тюрлю орунла чыгъарады. Аны бу жаны бла сынамы уллуду эм ахшы производство онглары бардыла.
Комбинатда жангы бийик технологиялы оборудование 45 минг квадрат метр жерни алады. Ол а бир айгъа 2 минг тонна картон эм 4 миллион квадрат метр гофрокартон чыгъарыргъа онг береди. Цехледе 220-дан артыкъ адам урунады.
Мында экологиягъа заран жетмезине аслам эс бурадыла. Сёз ючюн, макулатураны айгъа 2300 тонна жарашдырылгъаны 60 мингден аслам терекни неда 150 гектарда ёсген агъачны сакъларгъа себеплик этеди. Жылгъа 1800 тонна полиэтилен эм полипропилен жарашдырылгъаны да тёгерек-башны кир-кипчикден сакълауда болушады.
Импортну алышындырыуну юсюнден айтханда, «ЭРПАК» тыш къыралдан келтирилген материалланы бла химикатланы толусунлай кесибизникилеге алышыргъа хазырды. Аны бла байламлы бусагъатда тыш къыраллы крахмалны орунуна «Кабардинский» крахмал завод биригиуню продукциясын алырча мадар этиледи. Сынау халда аны хайырланып да башлагъандыла.