Кёп болмай Чегем районну администрациясыны башчысы Юра Борсов «Экинчи Чегем – Булунгу» жолну жангыртыу къалай баргъаны бла шагъырейленир муратда Тёбен Чегемде бла Хушто-Сыртда болгъанды. Аны юсюнден бизге муниципалитетни администрациясыны пресс-службасындан билдиргендиле.
Алгъаракълада, Чегем ауузунда республиканы Башчысы Казбек Коков болгъанында, турист-рекреация тийрелени айнытыуну жангы мардаларына келишген жол инфраструктураны къураргъа кереклисин айтхан эди. Бюгюнлюкде жолчула бордюрланы, эски асфальтны кетерип, жерни мурдорун кючлеп кюрешедиле. Аны чеклеринде жол кенгертилликди, жауун суу саркъырча арыкъла эм быргъыла да салынырыкъдыла. Дагъыда беш кёпюрге тынгылы ремонт этилликди, жаяу жолчукъла ишленирикдиле эм Чегем чучхурлагъа дери чыракълы чыпынла тартыллыкъдыла.
Ишле толусунлай быйылны ахырына бошалыргъа керекдиле.
Аны бла бирге, чучхурланы тийресинде кафелени аллары, тюкенчикле да жангы излемлеге кёре тюрлендирилликдиле. Къоркъуусузлукъну мадарлары да этилликди.
Эсге сала айтсакъ, бюгюнлюкде Тёбен Чегемни школуна да тынгылы ремонт этиле турады. Ишле бир тюрлю тыйгъычсыз, болжалдан кеч къалмай барадыла. Объект жангы окъуу жылгъа битерге керекди.