Медицина кереклеге, дарманлагъа этилген къоранчланы бир кесегин артха къайтарыргъа онг барды. Налог вычетни къалай жарашдырыргъа кереклисин бу статьяда окъугъуз.

Медицина жумушла, врач жазгъан дарманла   ючюн къоранчланы бир кесегин къайтарыуну юсюнден тилекни ахчаны тёлеген инсан жазаргъа боллукъду. Дагъыда кеси ыразылыгъы бла медицина страхованияны келишимни чеклеринде этилген тёлеулени къайтарыргъа онг барды. Ахчаны бир кесегин артха адам кесине неда юйюрюню келечилерине бакъдыргъанда  алыргъа эркин болгъанын айтырчады.

 Инсан кесине бакъдыргъан организацияны медицина жумушланы толтурургъа россейли лицензиясы болургъа кереклисин белгилерге тийишлиди.  

Медицина жумушла ючюн налог вычетни  эм уллу ёлчеми 120 минг сомду, андан 13 процент къайтарылады. Ол башха социал вычетле бла бирге къошулуп тёленнгенин айтырчады, алай бла 120 минг сом жылны ичинде алагъа барысына да юлешинеди. 

 Алай багъыу багъалы болса, низам тюрленеди. Бу кезиуде инсан къоратхан ахча толусунлай тергелип, аны 13 проценти къайтарыллыкъды. 

  Вычет къаллай жумушла ючюн бериледи? Медицина тинтиулеге, ол санда УЗИ, рентген, флюорография дегенча. Врачха аурууну тинтирге келген кезиуде тёлеуню бир кесегин. Дагъыда тишлеге багъыу ючюн да. Ол санда агъартханда,   брекетле, винирле, коронкала, имплантла салдыргъанда. 

Медицина экспертиза бла реабилитация, кесинге санаторийледе бакъдырыу жумушлагъа тёленнген ахчаны бир кесеги да къайтарылады. Солуу органлары, къан тамырлары, нервалары, аш оруну, онкология бла байламлы аурууладан къыйналгъанланы жаргъанда да барды аллай эркинлик. Ахча къаллай жумушла ючюн къайтарылгъаныны тизмеси   РФ-ни Правительствосу 2020 жылда 8 апрельде чыгъаргъан 458-чи номерли бегимде  басмаланыпды.

Къаллай документле керекдиле?  Ишлеген жерден 2-НДФЛ справка. Анда жылны ичинде этилген тёлеуле бла налогла жазыладыла. Дагъыда медицина жумушла ючюн тёлеулени справкасы. Ансыз ахчаны къайтарыр онг болмагъанын айтыргъа тийишлиди. Аны къырал, энчи иели медицина организацияда берирге борчлудула.

Аладан сора бу документлени копияларын излерге да боллукъдула: медицина жумушла этилгенини юсюнден келишимни (ол къабыл кёрюлсе), аланы тамамлагъан организацияны лицензияны. 

  Дарманланы сатып алыргъа этилген къоранчланы юслеринден айтханда уа, рецептни бланкы керекди, анда уа «РФ-ни налог органларына, налог тёлеучюню ИНН-и» деген мухуру болургъа  тийишлиди.

 Дарманны инсан атасына, анасына, неда сабийине  алгъан кезиуледе уа, аланы жууукълукъларына шагъатлыкъ этген документ изленирикди. Чек да керек боллукъду.

Тикаланы Фатима хазырлагъанды.