КъМР-ни Башчысы Казбек Коков Россей Федерацияны Президентини Шимал-Кавказ федерал округда толу эркинликли келечисинде советни видеоселектор кенгешине къатышханды.

Жыйылыуну Юрий Чайка бардыргъанды. АнгаРФ-ни жарыкъландырыу министрини орунбасары Татьяна Васильева, Урунуу эмда иш бла жалчытыу жаны бла федерал службаны башчысы Михаил Иванков къошулгъандыла. Кенгешде   Украинада энчи аскер операция бардырылгъан кезиуде СКФО-ну регионларында халны тутхучлулугъун кючлендириуню  амаллары сюзюлгендиле.

«Энчи аскер операция башланнганлы  социал болумну осалландырыр, миллетлени бир бирлерине юсгюртюр, халкъны къоркъутур, ол санда террорчулукъ ишле хазырлана турадыла, деген ётюрюк хапарла жайыу бла элгендирир мурат бла бузукъчу ишлерин тирилтгендиле», - дегенди СКФО-ну полпреди. 

Юрий Чайка билдиргенича, быйыл 24 февральдан 11 апрельге дери округну власть органларына террорчулукъ ишле хазырлана тургъанларыны юсюнден 100-ден артыкъ билдириу келгенди. Алагъа кёре 1,5 минг чакълы бир объект тинтилгенди.  Ётюрюк билдириуле этилгенлери бла байламлы 62 уголовный иш ачылгъанды. Полпред ётюрюк хапарланы билип жайгъанлагъа къажау ишни кючлендирирге керек болгъанын чертип айтханды.

 Ахча бла тыш къыралладан жалчытылгъан коммерциялы болмагъан организацияланы юслеринден да сёз баргъанды. Росфинмониторингни СКФО-да Регионла аралы управлениясыны шартларына кёре,  округда аллай 88 биригиу ишлейди. 2021 жылда алагъа тыш къыралладан 300 миллион сом чакълы бир ётдюрюрлгенди. «Аланы не ишле тындыргъанларын терен тинтиуню, ол санда шёндюгю энчи аскер операциягъа къажау бурулгъан мадарла этгенлерин бла къалгъанларын ачыкълауну дурус кёреме», - дегенди полпред.

Советни жыйылыуунда дагъыда иш хакъ тёленмей жыйылгъан борчну азайтыуну  мадарларына, РФ-ни Президентини билим бериу жаны бла буйрукълары къалай толтурулгъанларына къаралгъанды, Украинадан, Донецк эмда Луганск халкъ республикаладан округга келгенлеге болушлукъ этиуню амаллары сюзюлгендиле, тийишли буйрукъла да берилгендиле.

Кенгешге къатышханланы полпредни жангы орунбасары бла да шагъырей этгендиле.  Андрей Шабалин кадрла политика, къырал граждан къуллукъну, коррупция эм башха бузукълукъланы болдурмауну соруулары бла кюреширикди. Дагъыда РФ-ни Президентини округну жеринде приёмныйлени ишлерин бардырлыкъды.

Юсюпланы Галина хазырлагъанды.