КъМР-ни Парламентини башчысы Татьяна Егорова РФ-ни Федерал Жыйылыуунда Законодательлерини советини Билим бериу эм илму эмда Социал политика жаны бла комиссиялары бирге бардыргъан кенгешни ишине къатышханды. Тюбешиу видеоконференция амал бла къуралгъанды.
Сёз РФ-ни Законодательлерини советини «2022 жылда сабийлени саулукъларын багъыуда, реабилитацияда эм солутууда хайырланылгъан объектлерин жангыртыу эмда жай солуу кезиуге хазырланыу» деген жыйылыууна хазырланыуну юсюнден баргъанды.
Татьяна Егорова тюбешиуде сюзюлген сорууну магъаналылыгъын белгилегенди. Ол Къабарты-Малкъарны сабийлени багъыу, аланы солутуу эм рекреация онглары уллу болгъанларын билдиргенди.
– КъМР-де сабийлени солууларын къурау бла кюрешген 19 организация барды. Ол санда «Радуга» социал-реабилитация ара санаторий халда ишлейди. Анда, сабийлени солууларын къурагъандан сора да, тюрлю-тюрлю ауруулары болгъанланы багъыу жаны бла шёндюгю мадарла да сингдирилгендиле. Бу кезиуде уа багъыу балчыкъ, гара суу, башха бальнеология амалла хайырланыладыла. Ара сау жылны ишлейди, бери Россейни битеу регионларындан жашчыкъла бла къызчыкъла келедиле. Бюгюнлюкде уа анда Донецкден 35 сабий солуйду. Жууукъ кезиуде энтта жангы смена аллыкъдыла. Бу жумушлагъа ахчаны республика бёледи, – дегенди Татьяна Борисовна.
Спикер тюрлю-тюрлю кезиуледе республиканы 10 мингден аслам сабийини саулугъу багъылгъанын, солутуу жумушла къуралгъанларын билдиргенди. Аланы араларында 7 минги – къыйын жашау болумгъа тюшген юйюрледендиле. Башха регионладан да орта эсеп бла 7 минг жаш бла къыз келедиле.
– 2022 жылда 5 минг сабийни солутургъа эм саулукъларына къаратыргъа белгиленеди. Бу жумушлагъа бюджетде 185 миллион сом салыннганды, – деп белгилегенди ол.
Инфраструктураны юсюнден айтханда, иги халда болгъанла, тынгылы жангыртыргъа керек объектле да бардыла.
– Эпидемиология хал тапландырылгъаны бла лагерьле, санаторийле толу кючлери бла ишлеп башларла деп ышанабыз. Алай бла уа сабийлени солууларын къурагъан бла бирге, табийгъатыбызны энчиликлерин эсге алып, бу жумушланы андан ары тири бардырыргъа къолдан келлик эди. Солуу эм саулукъ сакълау учрежденияланы ырысхы-техника болумларын игилендириу, сабийлени солууларын къурау жаны бла предложенияла хазырлагъанбыз. Ол санда къыйын жашау болумгъа тюшген юйюрледе ёсгенле бла байламлыла. Ала комиссияны бегимини проектине кийирилгендиле. Бизни акъылыбызгъа кёре, РФ-ни Правительствосуна сабийлени солууларын бла саулукъларын игилендирген предприятиялагъа налог льготала тохташдырыуну юсюнден тилек этерге боллукъ эди. Бу сорууну да проектге къошаргъа тийишлиди, ол да жай кезиуде сабийлени солууларын къурауну игилендирирге себеплик этерикди,– дегенди сёзюню ахырында Татьяна Егорова.
Жыйылыуда РФ-ни Къырал Думасыны, регионлада законла чыгъарыучу органланы депутатлары да сёлешгендиле.
Ала РФ-ни Правительствосуна 2030 жылгъа дери къыралны субъектлеринде сабийлени солууларын бардырыу мекямланы ишлетиу эм жангыртыу программаны хазырлагъанда, регионла барысы да анга чырмаусуз къатышырча этерге, инфраструктураны жангыртхан кезиуде хауаны, табийгъатны болумларын эсге алыргъа, сау жылны ишлеген солуу араланы ишлетирге кереклисин айтхандыла.
Дагъыда къыйын жашау болумгъа тюшген юйюрледе ёсген сабийлени (7-18 жыллары толгъан), быйылдан башлап, солууларын къурагъанда, федерал бюджетден къоранчлагъа ахча бёлюуню юсюнден предложение да этилгенди.
Битеу эсгертиуле бла предложенияла РФ-ни Законодательлерини советини жыйылыуунда сюзюллюкдюле. Ол 26-27 апрельде бардырыллыкъды.
КъМР-ни Парламентини пресс-службасы.
