Къабарты-Малкъарны Башчысы Казбек Коков КъМР-ни Наркотиклеге къажау республикалы комиссиясыны жыйылыуун бардыргъанды. Ары КъМР-ни Парламентини таматасы Татьяна Егорова, КъМР-ни Правительствосуну Председатели Мусукланы Алий, РФ-ни Президентини СКФО-да толу эркинликли келечисини аппаратында КъМР-де баш федерал инспектор Тимур Макоев, республиканы Правительствосуну келечилери, надзорлукъ этген, право сакълагъан эм кюч структураланы таматалары къатышхандыла. Жыйылыуну чегинде Къабарты-Малкъар Республикада 2021 жылда жууаплы органланы наркотиклеге къажау, аланы сатыу-алыу бла байламлы эм профилактика бардырыу ишлерини эсеплери туура этилгендиле.

Жыйылыуну ача, Казбек Коков Наркотиклеге къажау къырал комиссияны стратегиясыны бардырылыууну чеклеринде чыгъарылгъан онгланы хайырындан республикада наркоманиялыкъ бла байламлы болум игиленнгенин белгилегенди. Наркотиклени хайырланып аманлыкъла этгенлени саны 4,5 кереге азайгъанды, наркотиклени законсуз обороту бла байламлы административ право бузукълукъланы ачыкълау 77,5 процентге кёбейгенди. Аны бла бирге республиканы Башчысы наркоманиялыкъны жайылыууна къажау ишни кючлегенлей турургъа кереклисин чертгенди.

Повесткагъа кёре хапарны Къабарты-Малкъар Республикада ич ишле министрни орунбасары Назир Мамхегов билдиргенди. Ол айтханнга кёре, наркотиклени сатыу бла байламлы бузукълукъланы ачыкълау 9,5 процентге кётюрюлгенди. Министрни орунбасары чертгенича, республикада наркотиклени сатыуну къураргъа кюрешиу ишле тохтамайдыла, наркотиклени тюбешмегенлей социал сетьлени болушлукълары бла жерлерине тапдырыу, «закладка» амалла хайырланыладыла.

Право сакълаучу органла наркотиклени, ол санда синтетикалыланы, жюрютюуге къажау ишни тирилтгендиле. Ол белгилегеннге кёре, наркотиклени законсуз обороту бла байламлы аманлыкъланы асламысында тыш къыраллы инсанла этедиле. Республиканы жамауатыны арасында наркоманиягъа къажау профилактика жумушла тындырыладыла.

КъМР-ни саулукъ сакълау министрини орунбасары Татьяна Аникушина наркотиклени хайырланыудан ычхыналмагъанлагъа тапдырылгъан медицина болушлукъну качествосун игилендириу амалланы юсюнден айтханды. Наркодиспансерни болжалгъа салынмагъанлай наркология болушлукъ тапдыргъан бёлюмюню интенсив терапия палаталарына медицина оборудование, профилактика жумушланы тамамлау жаны бла тюбешиуледе материалланы кёргюзтюрча оборудование сатып алыннганды.

Наркотиклени хайырланнганларын бла къалгъанларын тинтген профильли служба 100 мингден артыкъ адамгъа медицина къараула къурагъанды, аладан 30 минг чакълысы школланы бла орта билим берген махкемелени окъуучулары болгъандыла. Наркологический диспансерни мурдорунда «Акъылбалыкъ болмагъан эм юйюр» деген реабилитация ара къуралгъанды. Битеу да бирге алып айтханда, диспансер эм профилактика эсепден кетерилген саусузланы саны кёбейгенди, республикада тийишли медицина болушлукъ тапдырылырча  битеу болумла жарашдырылыпдыла.

КъМР-ни жарыкъландырыу, илму эм жаш тёлюню ишлери жаны бла министри Анзор Езаов республиканы билим бериу учрежденияларында терк-терк тестирование бардырылып тургъанын билдиргенди, аны хайырындан къоркъуулу къауумдан болгъан жаш адамланы осал къылыкъгъа берилгенлерин алгъадан билирге онг барды. Министерство наркотиклеге къажау жаш тёлю волонтёр организацияла бла байламлыкъла жюрютеди. Казбек Коков профилактика ишде волонтёрланы къатышыуларын кёбейтирге, жаш тёлюню арасында наркоманиялыкъгъа къажау ишни кючлерге бурулгъан социал магъаналы проектлеге грант себеплик этиу сорууну тинтирге буюргъанды.

КъМР-ни Наркотиклеге къажау республикалы комиссиясыны аппаратыны таматасы Юрий Шевченко 2021 жылда наркотикле бла болумну мониторингини эсеплерин ачыкълагъанды. Ол белгилегеннге кёре, наркотиклени билдирмегенлей, интернет-мессенджерлени болушлукълары бла сатыу ыз эм жангы веществоланы чыгъыулары бла байламлы полинаркоманиялыкъ болум сакъланыргъа боллукъду.

Казбек Коков наркотиклени жайыугъа къажау ишни эм бек биринчиден акъылбалыкъ болмагъанланы, жаш тёлюню арасында наркоманиялыкъны болдурмазча этиу жумушлада ведомствола аралы байламлыкъланы мындан арысында да кючлерге кереклисин айтханды. Жыйылыуну эсеплерине кёре КъМР-ни Наркотиклеге къажау республикалы комиссиясыны мындан ары бардырлыкъ ишини проекти къабыл кёрюлгенди.