Къэбэрдей-Балъкъэр къэрал университетым техникэмрэ естественнэ щIэныгъэхэмкIэ цIыхухэм яхуищIэ Iуэхутхьэбзэхэм я жармыкIэ иджыблагъэ екIуэкIащ. Абы кърихьэлIащ КъБР-м и колледжхэр къэзыуха цIыхуи 100-м нэблагъэ.

КъБКъУ-м щIэгъэтIысхьэным щыхуагъэхьэзыр IэнатIэмрэ IэщIагъэм зэрыхуаунэтI лэжьыгъэр къызэгъэпэщынымкIэ и къудамэм и унафэщI КIэрашэ Аксанэ жармыкIэм кърихьэлIахэм яIущIащ икIи щIэныгъэ нэхъыщхьэ университетым щызэбгъэгъуэтыным къыуит Iэмалхэм яхутепсэлъыхьащ. Абы къыхигъэщащ колледжыр къэзыухахэм Зыуэ щыт къэрал гъэунэхуныгъэхэм къыщахьа баллымкIэ е университет кIуэцIым щата экзаменхэмкIэ еджапIэм щIэтIысхьэфыну зэрыщытыр.

«Дэ хуабжьу дахуэныкъуэщ инженерхэм, технологхэм, программистхэм, химиемрэ физикэмрэ епха IэщIагъэлIхэм, егъэджакIуэхэм, дохутырхэм. ДызыхуэкIуэ илъэс зыбжанэм къриубыдэу щIэупщIэ зиIэ IэщIагъэхэм егъэлеяуэ захъуэжынущ. Иджырей технологиер, бжыгъэрылъанэ IэнатIэр, интеллект IэрыщIыр ди гъащIэм гуэхыпIэ имыIэу къыхэуващ, абы епха IэщIагъэхэми дыхуэныкъуэ хъунущ. IT-IэнатIэм щIэупщIэ ин дяпэкIэ зэриIэнур иджыпсту абы епха къудамэхэм къыщIэтIысхьэ цIыху бжыгъэм къагъэлъагъуэ», - жиIащ КIэрашэ Аксанэ.

КъБКъУ-м химиемрэ биологиемкIэ, физикэмрэ есэпымкIэ, интеллект IэрыщIымрэ бжыгъэрылъанэ технологиемкIэ, информатикэмрэ роботехникэмкIэ и институтхэм я IэщIагъэлIхэм жармыкIэм кърахьэлIащ цIыхур къызыщIэупщIэну Iуэхугъуэхэр къызытещ гъэлъэгъуапIэхэр, дэтхэнэ плIанэпэми зэхуэсыпIэхэмрэ уэршэрыпIэхэмрэ къыщызэрагъэпэщащ, упщIэ -жэуап жыпхъэм ит Iэнэ хъурейхэр щрагъэкIуэкIащ. Апхуэдэу жармыкIэм щхьэхуэу щытепсэлъыхьащ университетым иIэ унэтIыныгъэхэм, абыхэм ущIэтIысхьэн папщIэ узыхуэныкъуэну дэфтэрхэмрэ тхылъхэмрэ зыхуэдэм, еджапIэ нэужьым лэжьыгъэ къыщыплъыхъуэ хъуну IуэхущIапIэхэм, нэгъуэщIхэми.

Апхуэдэу «Абитуриент-2022» фIэщыгъэр зиIэ газет щхъуэкIэплъыкIэр, къудамэхэм ятеухуа хъыбарыр гупсэхуу щызэпкърыха тхылъ цIыкIухэр дэтхэнэ зыми хуагуэшащ.

ШУРДЫМ Динэ.