КъМР-ни Башчысы Казбек Коков РФ-ни Къырал советини санкцияланы кезиуюнде экономиканы тутхучлу айнытыу жаны бла ишчи къауумуну селектор кенгешине къатышханды. Жыйылыуну ишчи къауумну башчысы Сергей Собянин РФ-ни Правительствосуну Председателини биринчи орунбасары Андрей Белоусов бла бирге бардыргъанды.

 Ушакъгъа Россей Федерацияны субъектлерини толтуруучу властьны федерал органларыны башчылары эмда бийик къуллукъчула къатышхандыла. Ала Федерацияны субъектлеринде санкцияланы болумунда экономиканы андан ары айнытыуну, инсанлагъа къошакъ социал тутхучлулукъ этиуню амалларын сюзгендиле. Сёз дагъыда фармацевтикагъа, импортну алышындырыугъа, промышленностьха себеплик этиуню регион фондларына капиталларын кёбейтиуге болушурча мадарланы юслеринден баргъанды.

Россейни саулукъ сакълау министри Михаил Мурашко  Къабарты-Малкъар льготалары болгъанлагъа бек магъаналы эмда багъа тургъан дарманланы алыугъа келишимлени заманында этгенин айырып айтханды. Льготалары болгъанланы дарманла бла жалчытыуну къайгъысы КъМР-ни Башчысы Казбек Коковну буйругъу бла былтыр окъуна этилген эди. Регионну  2022 жылгъа бюджетинде ол жумушха 600 миллион сом чакълы бир салыннганды. Ол а медикаментледен къыстырыкъ къураргъа онг бергенди.

Кенгешде офсет контрактланы санын ёсдюрюуню, гитче бизнесге индустриялы паркланы, технопаркланы къурауну, адамланы бла жюклени ташыуну игилендириуню юслеринден да баргъанды. «Россейни Правительствосу предпринимательле бла байламлы план бла эмда пландан тышында бардырылыучу тинтиулеге чек салыугъа да уллу эс бурулады. Предпринимательле, гитче эмда орта бизнес бла кюрешгенле да ишлерин къыйналмай къурарча этилликди», - деп белгилегенди Казбек Коков кесини телеграм-каналында кенгешден сора.

Юсюпланы Галина хазырлагъанды.