Россейни Президенти Владимир Путинни буйрукъларыны чегинде Къабарты-Малкъар Республиканы Башчысы Казбек Коков къыралгъа санкцияла басынчакълыкъ этген кезиуде КъМР-ни экономика эм социал тутхучлулукъну жалчытыу жаны бла координация штабыны видеоконференция халда жыйылыуун бардыргъанды. Анга КъМР-ни Правительствосуну Председатели Мусукланы Алий, аны орунбасарлары, министерстволаны таматалары, муниципал администрацияланы оноучулары къатышхандыла.

Кенгешни чегинде республиканы экономикасыны эм магъаналы бёлюмлеринде болумгъа оператив халда къарауланы кёрюмдюлерин тинтгендиле. Ыйыкъ сайын мониторингни КъМР-ни Правительствосуну вице-премьерлерини таматалыкъларында отрасль штабла бардырадыла, анга гитче эм орта бизнес, инвестицияла, экспорт, агропромышленный комплекс, промышленность, сатыу-алыу, табийгъат къолайлыкъ, цифралы айныу, къурулуш, жашау журт-коммунал мюлк, транспорт, жол мюлк эм туризм ызла киредиле. Социал бёлюмге энчи эс бурулады, анга уа саулукъ сакълау, билим бериу, иш бла жалчытылыныу, социал къорууланыу, маданият, спорт киредиле.

Республиканы таматасы бюгюнлюкде болум тап халда болгъанын айтханды. Федерал сетьлени санында тюкенледе, сурам бийик болгъаны ючюн, бал тузну келтириу бла байламлы чурумла энди жокъну орунундадыла.

КъМР-ни Правительствосуну Председателини биринчи орунбасары Сергей Говоров сатыу-алыу розница сетьде товарланы, ол санда биринчи кереклеге изленнген къауумланы, къытлыгъы эсленмегенин билдиргенди. Республиканы промышленность, сатыу-алыу эм энергетика министри Шамиль Ахубеков аш-азыкъны эм биринчи изленнген затланы багъаларына къаралгъанлай тургъанын айтханды. Багъалагъа артыкъ къошулуу эм товар къытлыкъ болмазча тинтиуле право сакълаучу эм контроль органланы, уллу сатыу-алыу араланы келечилери бла байламлыкъда бардырыладыла.

Казбек Коков республиканы битеу районларында уллу болмагъан сатыу-алыу этген жерледе да тинтиуле къуралырча буйрукъ бергенди.

Сергей Говоров урлукъ себиу кампания тийишли низамда бардырылгъанын билдиргенди. Жазлыкъланы себиу жерле 224 минг гектар чакълы бирдиле, ол былтыргъы жылны ёлчемине жетеди. Чёплеуню эм жемиш-жилеклени себерча бёлюннген жерле да азаймагъандыла. Картоф салынырыкъ жерле кёбейтилинирикдиле. КъМР-ни къурулуш эм ЖКХ министри Алим Бербеков миллет проектлени, федерал эм регион программаланы чеклеринде планнга кийирилген социал магъаналы объектлени къурулушлары планнга кёре бардырылгъанларын белгилегенди. Бусагъатда къурулуш материаллагъа бирден багъаланы кётюрюу эсленмейди. КъМР-ни экономика министри Рахайланы Борис бизнесге себеплик этиу амалланы юсюнден хапарлагъанды.

Казбек Коков промышленностьну, агропромышленный комплексни, турист бёлюмню предприятияларына башламчылыкъ халда болушлукъ тапдырыуну магъаналылыгъын чертгенди. Башчы импортну алышындырыу жаны бла тири ишлеген компаниялагъа себеплик этиу соруугъа энчи эс бурууну излегенди. Регионну оноучусу битеу бюгюнлюкде хайырланнган финанс продуктланы банкла бла бирге тинтирге, предпринимательлеге информация-методика болушлукъну эм аланы алыуда себепликлени къураргъа буюргъанды.