Казбек Коков Къабарты-Малкъарны Башчысында Жаш тёлю политика жаны бла  советни биринчи жыйылыуун бардыргъанды.
 Совет республиканы оноучусуну башламчылыгъы бла былтырны ахырында къуралгъанды. Анга КъМР-ни жаш тёлю активинден 56 адам киргенди. Аланы араларында муниципалитетлени, жамауат организацияланы, волонтёр биригиулени, конфессияланы, тюрлю-тюрлою организацияланы бла предприятияланы келечилери да бардыла. Советге Казбек Коков кеси башчылыкъ этеди.
 Тюбешиуге къатышханланы алгъышлай, республиканы Башчысы былай дегенди: «Къырал властьны жаш тёлю бла ишлерик энчи толтуруучу органны къурауну юсюнден оноу этиле турады. Болсада ары дери да властьдан тышында аллай бир орган керекди деп, алай оюмлайма. Ол жаш тёлю бла байламлы проблемалагъа, аладан къутулууну амалларына бютюн тынгылы къарарыкъды, халны сюзерикди, тюз оноула чыгъарлыкъды деп, бек ышанама. Аны, республиканы Башчысыча, магъаналыгъа санайма, координация советге кесим башчылыкъ этсем тюз болур деп, алай къарайма».

 Казбек Коков Советни баш борчларындан бирин да белгилегенди – Россейге къажау политика эмда фашист идеология бла кюреш бардырыргъа.  «Украинада бола тургъан ишле жаш тёлю политика къыралны къурамында уллу магъананы тутханын кёргюзтгендиле. Украинаны башчылары бардыргъан жаш тёлю политика, миллетчилик жанына тартхан, Россейге къажау бурулгъан политика, жарсыугъа,  игиликге келтирмегенди. Сау тёлю радикал, миллетчилик ниетледе ёсгенди, бир затдан артха турмазгъа хазыр болуп. Ол а энди бир къыралны угъай, саулай дунияны да баш аурууу болуп чыкъгъанды.

Бизни жаш тёлюбюзге тышындан миллетчилик эмда экстремизм ниетлени сингдирирге кюрешгенлеге арталлы да жол бермезге керекди. Регионла бизни къыралгъа къажау кийирилген къаты санкцияланы болумунда социал-экономика тутхучлулукъну жалчытыргъа борчлудула. Бизге къажау ачылгъан санкциялы урушха биз къыралны хар жаны бла да айнытыу эмда кючлендириу бла жууапларгъа керекбиз. Жаш тёлю политиканы тюз ызын белгилеуге власть органла бла жамауат биригиуле тири къатышыргъа эмда ол жаны бла ишлерин бютюн къыйматлы бардырыргъа борчлудула»,- деп чертгенди регионну оноучусу.

 КъМР-ни жарыкъландырыу, илму эмда жаш тёлюню ишлери жаны бла министри Анзор Езаов,  республикада этилген мадарланы юсюнден билдире,   жаш тёлюню лидерлерин бла активистлерин хазырлаугъа, саулукълу жашау этиуню пропагандалаугъа, хунерлилеге себеплик этиуге, жаш адамланы араларында правогъа бузукълукъла болдурмаугъа баш магъана берилгенин чертгенди. Юч жылны ичинде битеуроссей даражалы ишлеге, ол санда Маданиятны бла искусствону жаш келечилерини «Таврида» эмда «Таврида-АРТ» форумлагъа, региондан 200 чакълы бир жаш адам къатышханды. Хорлагъанла уа проектлерин жашауда бардырыргъа грантла алгъандыла – битеу да 12 миллион сом. Республикадан 157 жаш тёлю проект бек игилеге саналгъандыла, аланы жашауда бардырыугъа 130 миллион сом бёлюннгенди.

 Россейни доброволецлерини «Юнармия» сабий-жаш тёлю къымылдаулары, ары уа 6 минг  чакълы  сабий киреди, къыралда 15 бек иги патриот организацияны эмда СКФО-да юч алчы субъектни санына киреди.  «Школчуланы россейли къымылдауларыны» келечилери уа битеуроссей эришиулени тюрлю-тюрлю номинацияларында биринчиле болуп келедиле. «Большая перемена»  уа былтыр Къабарты-Малкъардан беш хунерли школчуну сайлагъанды.  Огъурлу ишлени региону»  деген битеуроссей конкурсну чеклеринде  Къабарты-Малкъар юч жылны ичинде  добровольческий проектлени тамамларгъа субсидия халда 23,7 миллион сом алгъанды.

 Республиканы жаш тёлю активи да туризм, спорт, маданият, социал политика, жандауурлукъ, башламчылыкълагъа ахча бла себеплик этиу жаны бла да оюмларын туура этгенди.  Тюбешиу, бир бирге оюмларын айтыудан, даулашлагъа кёче, ачыкъ халда баргъанды. Жаш адамла республиканы оноучусуна планларын, башламчылыкъларын, ниетлерин туура этгендиле эмда андан ыразылыкъ алгъандыла. 

 КъМР-ни Башчысы жууукъ заманлада толтурулурча къауум буйрукъ бергенди. Советге КъМР-ни Правительствосу, республиканы Жарыкъландырыу, илму эмда жаш тёлюню ишлери жаны бла министерствосу бла бирге муниципалитетлени жаш тёлю бла байламлы ишлерине багъа бичиуню жангы амалларын жарашдырыргъа,  жаш тёлю биригиулени ишлери, ол санда Жаш тёлю чыгъармачылыкъны къаласыны ишин да, бютюн къыйматлы этиуню юсюнден оюмларын билдирирге кереклиси айтылгъанды.

 Андан сора да, шимал-кавказ жаш тёлюню Къабарты-Малкъарны 100-жыллыгъына жораланнган фестивалыны программасын хазырларгъа, аны жарашдыра туруп, жаш адамланы башламчылыкъларына ахча бла себеплик этерге тийишлиди. Советни келечилери къырал политиканы жашауда бардырыугъа тири къатышырыкъдыла, жаш тёлюню сейирлерин къорууларыкъдыла.

 Тюбешиуню юсюнден оюмун Казбек Коков кесини телеграм-каналында билдиргенди. «Республиканы социал-экономика айныууну битеу бёлюмлеринде жаш тёлю бла ишлеу эсге алыныргъа керек болгъанын къатлап чертеме. Сёз, ол санда, жаш тёлю инфраструктураны, тюрлю-тюрлю араланы къурауну юсюнден да барады. Бек башы – тюбешиуню кезиуюнде мен сагъыш эте билген, кеслери алларына къаллай болсада жетишимге жетген, андан ары барыргъа таукел болгъан адамланы кёргенме. Совет жаш тёлю къымылдаугъа бла жаш тёлю башламчылыкълагъа жангы кюч берлик, алгъа талпындырлыкъ команда боллугъуна ишексизме»,- дегенди Казбек Коков.

Юсюпланы Галина хазырлагъанды.