КъБР-м и Правительствэм интернетым щиIэ напэкIуэцIымрэ VK интернет-утымрэ иджыблагъэ щекIуэкIащ КъБР-м егъэджэныгъэмкIэ, щIэныгъэмрэ щIалэгъуалэм я IуэхухэмкIэ и министр Езауэ Анзор и нэтын занщIэ.

Псалъэмакъым и кIуэцIкIэ министрыр тепсэлъыхьащ «Егъэджэныгъэ», «Демографие» лъэпкъ проектхэр ди щIыналъэм гъэзэщIа зэрыщыхъум, курыт щIэныгъэ щызрагъэгъуэт еджапIэщIэхэр зэрыщаухуэм, жьы хъуахэр зэрызэрагъэпэщыжым, еджакIуэхэр шхын пщтыркIэ къызэрызэрагъэпэщым, интернет псынщIэр еджапIэхэм зэрыщIашэм.

Министрым зэрыжиIамкIэ, Къэбэрдей-Балъкъэрым 2024 гъэ пщIондэ цIыху мин 11,5-рэ зыщIэхуэн еджапIэ 18 щаухуэнущ,

«Къэбэрдей-Балъкъэрым и щIыналъэ зэхуэмыдэхэм еджапIибл щаухуэнущ зэман гъунэгъум. Мы махуэхэм абы пыщIа лэжьыгъэхэр зи пщэ далъхьэну ухуакIуэ гупхэм я зэхьэзэхуэ йокIуэкI. ЗэрытедубыдамкIэ, а еджапIэхэр 2023 гъэм и кIэ пщIондэ яухыу яутIыпщын хуейщ. Иджыри еджапIийм теухуауэ унафэ пыухыкIахэр щыIэщ, ухуакIуэ гупхэмрэ дэрэ зэтщIылIа зэгурыIуэныгъэхэм япкъ иткIэ, лэжьыгъэхэр 2024 гъэм и кIэхэм зэфIагъэкIын хуейщ», – жиIащ Езауэм.

Абы къыдэкIуэу, министрым къыхигъэщащ Прохладнэ (цIыху 785-рэ щIэхуэу), Куба (цIыху 500 щIэхуэу), Нарткъалэ (цIыху 500 щIэхуэу) щащ1 еджапIэхэр зэман кIэщIым къриубыдэу яухыну къазэрыпэщылъыр. Абы нэмыщI, «Демографие» лъэпкъ проектым тету Къэбэрдей-Балъкъэрым цIыху 2085-рэ зыщIэхуэн сабий гъэсапIэ 31-рэ щаухуэнущ.

Къэбэрдей-Балъкъэрым «ЗыужьыпIэ» зыфIаща центрхэр еджапIэхэм къызэрыщыIуахми, абы епха еджэныгъэ программэхэм зэрызаубгъуми и гугъу ищIащ министрым. 2021 гъэм ди хэгъэгум апхуэдэ центр 38-м лэжьэн щыщ1адзащ. Къыхэгъэщын хуейщ центрхэр унэтIыныгъэ зэмылIэужьыгъуэхэм ятеухуауэ зэрыщытыр, къуажэхэм дэт еджапIэхэм къызэрыщызэIуахыр.

Апхуэдэу «Еджэныгъэм и бжыгъэрылъанэ дуней» къэрал программэм ипкъ иткIэ, курыт еджапIэхэр иджырей техникэкIэ къызэрагъэпэщ. Къэбэрдей-Балъкъэрым ит еджапIэ псоми 2024 гъэм ирихьэлIэу компьютер классхэр яIэнущ. Абы къищынэмыщIауэ, «Кванториум» фIэщыгъэр зиIэ сабий технопаркхэр къызэIухынри щIагъэхуэбжьэнущ.

Министрым зэрыжиIэмкIэ, пэщIэдзэ классым щIэс сабийхэр шхын пщтыркIэ къызэрагъэпэщ - псори зэгъусэу 523000-рэ. Шхыным и фIагъымрэ щыIэ мардэхэм зэрыхуэкIуэмрэ кIэлъыплъ гупхэр щыIэщ, псалъэмакъ къызэрыхэмыкIыным кIэлъыплъу, щыщIэныгъэхэр игъуэм зэтес ящIыжу.

Нэтын занщIэм и кIэм Езауэ Анзор тепсэлъыхьащ еджэныгъэ системэр пандемием ипэ ита лъэхъэнэхэм щыIа щытыкIэм зэрыхуэкIуэжым, къэрал гъэунэхуныгъэхэри а жыпхъэм зэрытехьэжым.

Езауэ Анзор драгъэкIуэкIа нэтын занщIэм фыщеплъыфынущ КъБР-м и Правительствэм и сайтымрэ VK интернет-утымрэ.

ШУРДЫМ Динэ.