Къэбэрдей-Балъкъэрымрэ Бахъсэн щIыналъэмрэ къызэрызэрагъэпэщрэ илъэси 100 щрикъум ирихьэлIэу ирагъэкIуэкIыну траухуа Iуэхугъуэхэм ящыщщ Ислъэмей къуажэ дэт курыт еджапIэ №4-м иджыблагъэ щызэхэта «Iущхэмрэ Iущыцэхэмрэ» зэпеуэр.

Зэхьэзэхуэм хэтащ Бахъсэн щIыналъэм курыт щIэныгъэ щызрагъэгъуэту ит IуэхущIапIэхэм къикIа ныбжьыщIэ 30-м щIигъу. Хэку зауэшхуэм и лъэхъэнэм теухуа зэпеуэм къиубыдырт щIыналъэм и тхыдэм, къуажэхэм я къекIуэкIыкIам, лIыхъужьхэмрэ узэщIакIуэхэмрэ зыIута IэнатIэм ехьэлIауэ цIыкIухэм ябгъэдэлъ щIэныгъэр къэхутэныр, абыкIэ зэгъэныкъуэкъуныр.

«Iущхэмрэ Iущыцэхэмрэ» ныбжьыщIэ зэхьэзэхуэм хыхьа сабийхэм я гупсысэкIэмрэ Iуэху бгъэдыхьэкIэмрэ къалъытэну, я щIэныгъэмрэ ябгъэдэлъ есэныгъэхэмрэ здынэсыр къахутащ къэпщытакIуэ гупым хэтхэм. Абы хыхьащ Бахъсэн щIыналъэм и Жылагъуэ палатэм и унафэщI Къаздэхъу Олег, ХьэтIохъущыкъуей Ипщэ (Зеикъуэ) къуажэм дэт, сабийхэр гъуазджэм щыхуагъасэ еджапIэм и унафэщI Жылау Арсен, Бахъсэнёнкэ (Къэсейхьэблэ) и Ветеранхэм я советым и Iэтащхьэ Нэгъуей Абдул, Ислъэмей къуажэм дэт курыт еджапIэ №4-м цIыхум и гъащIэр, и узыншагъэр хъумэнымрэ (ОБЖ) технологиемкIэ и егъэджакIуэ Бештокъуэ Аслъэн сымэ.

Зэхьэзэхуэм хуагъэхьэзыра упщIэхэм я жэуап пэжым и закъуэтэкъым еджакIуэхэм утыку кърахьэн хуейр. Абыхэм къапэщылът жэуап зрат упщIэхэр Iуэхугъуэ пыухыкIам ирахьэлIэу езыхэри абы къызэрыхэкIыну щIыкIэм теухуа гупсысэхэмкIэ къэпщытакIуэ гупым ядэгуэшэну, пIалъэ кIэщIым къриубыдэу ар зэрагъэзахуэу пэрэ кIэрэ зиIэ гупсысэ шэщIакIэ къаIуэтэну.

«Ныбжьыщ1эхэр щIыналъэм и тхыдэм хъарзынэу зэрыщыгъуазэр, щытыкIэ къызэрымыкIуэ иту яхуэбгъэув упщIэхэм жэуап къызэрыхуагъуэтыфыр зэхьэзэхуэм къигъэлъэгъуауэ къызолъытэ. Зы унэтIыныгъэ къыхэпхыу абы ехьэлIауэ щыIэнкIэ хъуну Iуэху еплъыкIэхэри, бгъэдыхьэкIэхэри щызэпэплъыткIэ, къэхутэныгъэ куэд къыбоIэт, тхылъ куэд щIыбоджыкI. Нобэрей зэпеуэм быдэу си фIэщ ищIащ ди егъэджакIуэхэр я къалэным хьэлэлу зэрабгъэдэтыр, абыхэм сабийхэм ират есэныгъэхэри утемыукIытыхьу утыкушхуэ ипхьэ зэрыхъунур. Iэмалыншэу удехьэх, узыIэпешэ тхыдэ Iуэхум. Дауи удимыхьэхынрэ, сабийхэм я нэхъыбэм я адэшхуэ-анэшхуэхэр хэтащ а къэхъукъащIэ блэкIахэм», – жиIащ Бахъсэн щIыналъэм егъэджэныгъэмкIэ и къулыкъущIапIэм и унафэщI Абрэдж Тамарэ.

Зэхьэзэхуэм и утыкум къихьа ныбжьыщIэхэм и жэуап къэтыкIэкIи, и утыку къихьэкIэкIи, и гупсысэ зэпыгъэувэкIэкIи къахэщащ Къэсейхьэблэ дэт курыт еджапIэ №3-м и 9-нэ классым щIэс МамыкIэ Кристинэ.

Зэпеуэм къыхалъхьа упщIэхэмрэ жэуапхэмрэ зэгъэуIужауэ Бахъсэн щIыналъэм курыт щIэныгъэ щрагъэгъуэт и IуэхущIапIэ псоми хузэбгратыкIыныр игъуэу къалъытащ къэпщытакIуэ гупым хэтхэм.

ШУРДЫМ Динэ.