«COVID-19 узыфэм игъэсымаджэхэр нэхъ мащIэ хъунущ мэкъуауэгъуэ мазэм ирихьэлIэу, абы иужькIэ коронавирусым епха пандемиер щыIэжынукъым», - жиIащ Гамалее Н. Ф. и цIэр зезыхьэ, Эпидемиологиемрэ микробиологиемкIэ лъэпкъ къэхутакIуэ институтым и щIэныгъэ лэжьакIуэ нэхъыжь, вирусолог, медицинэ щIэныгъэхэм я доктор, профессор Альтштейн Анатолий.
Абы и псалъэхэм къызэрыхэщымкIэ, дуней псоми хуэдэу, Урысейми коронавирус узыфэ зэрыцIалэр зыпкърыт сымаджэхэр нэхъ мащIэ щохъу. ЩIэныгъэлIым къызэрилъытэмкIэ, коронавирусымкIэ нобэ щыIэ щытыкIэр фIыуэ къыщхьэщокI илъэситI ипэкIэ дызэрытам, абы къегъэлъагъуэ эпидемием и лъэужьыр «зэригъэкъэбзэжыр».
«Узыфэ зэрыцIалэм зэрыпэщIэт вакцинэр зыхезыгъэлъхьахэр куэд мэхъу - ди цIыхухэм я процент 50-м нэхърэ нэхъыбэщ, - жеIэ вирусологым. – КъищынэмыщIауэ, сымэджахэри куэд мэхъу. Сытми, сэ сызэреплъымкIэ, мэкъуауэгъуэм ирихьэлIэу эпидемиер щыIэжынукъым».
Узыфэ зэрыцIалэхэмкIэ IэщIагъэлI Поздняков Андрей зэрыжиIэмкIэ, сымаджэхэм я бжыгъэр нэхъ мащIэ хъуами, зэман кIэщIым къриубыдэу Урысейм коронавирусымкIэ пандемиер щымыIэжыну къэплъытэныр захуагъэкъым. Абы къызэрыхигъэщымкIэ, узыфэм и гуащIэгъуэр щхьэщыкIыну аращ.
COVID-19-р зыпкърытхэм я бжыгъэр Урысейм нэхъ мащIэ зэрыщыхъуар щыжаIэ коронавирус узыфэ зэрыцIалэм земыгъэубгъуным пэщIэтынымкIэ федеральнэ оперативнэ штабми. Къагъэлъэгъуа бжыгъэхэм ятепщIыхьмэ, ди къэралым иужьрей жэщ-махуэм къриубыдэу коронавирусыр япкърыту къыщахутащ сымаджэ 29 709-рэ, госпиталхэм ягъэгъуэлъащ 2187-рэ, узыфэм илIыкIащ цIыху 409-рэ.
Абы и лъэныкъуэкIэ Къэбэрдей-Балъкъэрми щытыкIэр нэхъ зэпIэзэрыт щыхъуащ. Гъатхэпэм и 21-м ирихьэлIэу щыIэ хъыбархэм ятепщIыхьмэ, сымаджэхэм я бжыгъэм хэщIурэ макIуэ. Апхуэдэу ПЦР-тесту 1488-рэ ирагъэкIуэкIати, коронавирус узыфэ зэрыцIалэ лIэужьыгъуэщIэр цIыху 47-м япкърыту къахутащ. КТ къэпщытэныгъэр цIыху 26-м ирагъэщIащ, абыхэм ящыщу 10-м вирус пневмониер яIэщ. Госпиталхэм ягъэгъуэлъащ сымаджэ 11. Мы зэманым къриубыдэу абыхэм я узыншагъэр щызэфIэзыгъэувэжхэм я бжыгъэр 141-рэ мэхъу - 17-р сабийщ, зы цIыхубз уэндэгъу яхэтщ, кислород дэIэпыкъуныгъэ хуэныкъуэхэр 66-рэ мэхъу. Госпиталхэм я реанимацэ къудамэхэм цIыху 28-рэ щIэлъщ, ИВЛ-м – 4, НИВЛ-м 10 пыщIащ. Иужьрей жэщ-махуэм къриубыдэу узыфэ зэрыцIалэм илIыкIащ зы цIыху. ОРВИ-м и нэщэнэхэр яIэу амбулаторэ кIэлъыплъыныгъэм щIэтщ сымаджэ 2443-рэ, абыхэм ящыщу 1088-р сабийщ, коронавирус узыфэ зэрыцIалэр зыпкърыту къахутахэр 901-рэ мэхъу. Псори зэхэту (госпиталым къыщIатхыкIыжахэри амбулаторэ дэIэпыкъуныгъэ зыгъуэтахэри) хъужахэм я бжыгъэр 6I2-рэ мэхъу.
ЩХЬЭЩЭМЫЩI Изэ.
