РФ-ни Эл мюлк министри Дмитрий Патрушев бизни къыралда АПК-да эмда аш-азыкъ рынокда болумну сюзюу жаны бла оператив штабны кезиулю кенгешин бардыргъанды. Анда ашлагьа багъаланы тохташдырыуну, шёндюгю сабан ишле къалай баргъаныны, къырал берген болушлукъну аграрийлеге жетдириуню юсюнден да сёлешгендиле.

Министр айтханыча, сагъынылгъан жумушланы тамамлау жаны бла чурум жокъду. Продуктланы талай тюрлюлерине сурам уллу болгъанлыкъгъа да къарамай,  аланы тюкенлеге ташыу тири барады. Аны белгилеп, ол регионлагъа бу ишге тынгылы кёз-къулакъ болургъа чакъыргъанды.

Федерал арада да бизнесге къошакъ халда себеплик этерге дейдиле. Министерствону аграрийлени учуз кредитле бла онгдуруу ишни кенгертирге керекди деген оюмун Правительствода дурус кёргендиле. Жаз башында сабан ишлени кезиуюнде ол бегирек да изленнгенин чертгендиле. Аграрийлеге дагъыда алгъын кезиуледе алгъан кредитлерин кечирек къайтарыргъа амал берилгенди. Дмитрий Патрушев айтханыча, кредитлени ставкасы тюрленмей, алгъынча,  беш процентден озарыкъ тюйюлдю.

Башха бёлюмлеге да билеклик этилликди дегендиле кенгешде. Ол санда ётмек бишириучюлеге 2,5 миллиард сом берилликди. Ахчаны регионлагъа, болжалына салмай,  жиберликдиле. Энтта да эки миллиард сом бла уа минерал семиртгичлени, мирзеуню эмда эл мюлк продукцияны ташыуда этилген къоранчланы жабаргъа дейдиле. «Росагролизингден» техника сатып алыргъа къошакъ халда энтта да 12 миллиард сом бёлюнюрюкдю. Аны юсюне уа АПК-да къармашхан гитче эмда орта предприятияланы ишлерин быйыл тинтирик тюйюлдюле.

Сабан ишлеге регионла аз-аздан къошулуп башлагьандыла. Баш борч - аны тынгылы бардырыуду. Министерствону башчысы мюлк-техника ресурслагъа бек къаты болургъа, къырал берген ахчаны да иелерине мычымай жетдирирге чакъыргъанды. Дагъыда бёлюмню техника жаны бла жангыртыуну унутмазгъа, льгота лизингни онгларын толуракъ хайырланыргъа кереклисин белгилегенди.

Саулай айтханда уа урлукъ себиу оналты регионда барады. Аграрийле аны 235 минг гектарда тамам этип бошагьандыла. Дагъыда 3,88 миллион гектарда ёсген кюзлюклеге минерал семиртгичледен жайгъандыла.

Улбашланы Мурат хазырлагьанды.