Ипотекагъыз, кредит картагъыз, автомашина неда башха зат сатып алыргъа берилген кредитигиз бар эсе, сиз аланы юсю бла тёлеулени алты айгъа болжалына салыргъа боллукъсуз. Бу жумушну быйыл 30 сентябрьге дери тындырыргъа эркинлик бериледи.

Быллай онг кимлеге бериледи:

- кредит келишимни быйыл 1-чи мартха дери этгенлеге;

- заявканы берген айны аллында ай къолайлыкълары (алгъын жыл бла тенглешдиргенде) 30 процентге тюшгенлеге.

Кредит каникулла алыргъа сюйгенден банк быллай документле излерге боллукъду:

- ишлеген жеринден 2-НДФЛ справканы;

- ишсизди деп эсепге тургъаныны юсюнден справканы;

- больничный къагъытны.

Банк сурагъан документлени 90 кюнню ичинде жарашдырып берирге керекди. Чурум этген сылтау бар эсе, аны болжалын энтта да 30 кюннге созаргъа боллукъду. Ызы бла банк аланы беш кюнню ичинде сюзюп жууап берликди.

Айтылгъаныча кредит каникулла алты айгъа дери созулургъа боллукъду. Аны болжалын сиз кесигиз сайларгъа эркинсиз. Ол кезиуде кредит ючюн тёлемей турургъа боллукъду. Банк а аны ючюн не тазир салыргъа, неда къошакъ тёлеу излерге эркин тюйюлдю.

Каникулну кезиуюнде ипотека ючюн процентле аны келишимине кёре тергеледиле. Башха кредитлени процентлери уа Ара Банк тохташдыргъан мардагъа кёре.

Бу амалны хайырланыргъа сюйгенлеге энтта да быллай излемле бардыла:

- заявканы берген сагъатда инсан ипотека каникуллада болмазгъа керекди;

- бир ненча кредитлери болгъанла аланы хар бири ючюн каникулла алыргъа эркиндиле;

- каникул берилгени кредит тарыхда да кёргюзтюллюкдю. Алай инсан ол кезиуде тёлемей тургъаны уа – угъай. Аны себепли быллай тарыхы бузуллукъ тюйюлдю.

Улбашланы Мурат хазырлагъанды.