Республикада Промышленность, энергетика эм сатыу-алыу министерство кёз-къулакъ болгъан предприятияланы бары да алгъынча ишлейдиле, шёндюгю болумгъа къарамай, социал, производстволу эмда экология жаны бла проектлерин бардырадыла. Алада уруннганланы санын неда аланы хакъларын азайтыу деген хапар жюрюмейди, ишни тохтатыргъа умут да жокъду, дегендиле ведомствода.

Предприятияланы бары да РФ-ни промышленность жаны бла къырал информациялы системасында (ГИСП) эсепде турадыла. Ол Россейни бу сферада политикасын тамамлауда баш жерни алады, промышленность не халда болгъанын, келир кезиуледе къалай айнырыгъын кёргюзтеди. Кеси жанындан министерство аланы ишлерине дайым къарагъанлай турады, чурум неда бузукълукъ эслесе, мадар этерикди.

Саулай айтханда, республиканы промышленность сферасында машинала ишлеу, тюрсюнлю металлургия, химия, женгил, агъач жарашдырыу эм башха предприятияла бардыла. Женгил промышленность бёлюмде къумач сокъгъан фабрика ачылгъанды. Анда орнатылгъан шёндюгюлю  оборудованияны хайырындан къумачны иги кесек  тюрлюсюн чыгъарып башларгъа боллукъду. Толу кючю бла ишлеп башласа, ол саулай къыралда эм уллу фабрикаладан бирине саналлыкъды. Кеси да бир жылгъа бир миллиард сомгъа дери продукция чыгъарып тебирерикди. Аны къатында ачыллыкъ быстыр тигиучю фабрикала да продукция бла толусунлай жалчытынырыкъдыла.

Импортну алышындырыу программаланы чеклеринде КъМР-ни Правительствосу РФ-ни Промышленность министерствосу эмда башха федерал ведомствола бла дайым байламлыкъда ишлейди, предприятиялагъа да себеплик этеди.

Улбашланы Мурат хазырлагъанды.