Битеуроссей халкъ фронтну (ОНФ) Къабарты-Малкъарда бёлюмюню келечилери Нальчик шахарны администрациясына Кадыров атлы орамда эки бошуна атылып тургъан общежитиягъа адам кирмезча мадар этигиз эмда аланы отоуларын кир-кипчикден тазалагъыз,деп сёлешгендиле. Бу къоркъуулу объектлени юсюнден ала «Сабийликни къоркъуусузлугъу» деген мониторинг бардыргъанларында билгендиле. Общежитияла 25 номерли орта школгъа баргъан жолну жанында орналадыла.

«Алада жашагъанланы арт жыллада башха журтлагъа кёчюргендиле. Шёндю уа бу объектледе жашау этерге чыртда жарамайды. Аланы эшиклери, терезелери да жокъду, ичлерине уа ким сюйсе да кирирге боллукъду», - дегендиле ол тийреледе юйлени иелери.

Халкъ фронтну келечилери иш ала айтханларыча болгъанын жерине барып кёргендиле. Ол журтланы эшиклери, терезелери да ууалып тургъанларын, отоуларында уа кир-кипчик жыйылгъанын эслегендиле. «Бу затла санитария-эпидемиология жаны бла законлагъа бузукълукъ этилгенини белгисидиле. Аланы эшиклерин бегитирге кереклисини ол биринчи сылтаууду. Экинчиси уа – сабийле ары кирип, хыли этерге боллукъдула. Андан сора да, быллай атылып тургъан объектлени аманлыкъчыла кеслерини жумушларында хайырланыргъа угъай дерик тюйюлдюле», - дегенди ОНФ-ни активисти Ислам Макоев.

  Алай болгъандан сора да, бу эриши объектле шахарны кёрюмдюсюн бузадыла, деп къошханды ол. Аны себепли Нальчикни администрациясына эсгертиу этилгенди. Башында айтылгъаныча, тёгерек-башын бегитирге, отоуларын да тазаларгъа кереклиси белгиленнгенди.

Улбашланы Мурат хазырлагъанды.