Къабарты-Малкъарны Башчысы Казбек Коков Регионну айнытыу жаны бла правительстволу комиссияны президиумуну кенгешине къатышханды. Ол РФ-ни къурулуш эм ЖКХ министри Ирек Файзуллинни таматалыгъында бардырылгъанды.

Кенгешде федерал проектлени эм социал-экономика айнытыу программаланы, инфраструктура бюджет кредитлени чеклеринде проектлени бардырыуну сюзгендиле. Бек магъаналыгъа къыралгъа экономика басынчакълыкъ этиу болумлада шахарны ишлеу бёлюмню айнытыугъа къошакъ амалланы къурау тема болгъанды. Министр бир ненча регион ызда, ол санда къурулуш бёлюмде, къытлыкъгъа къажау онгланы жыйымдыкълары къуралгъанларын айтханды.

Къабарты-Малкъар Республикада быйыл 512 минг квадрат метр жашау журтланы хайырланыугъа берирге умутлудула, январь-февральгъа 31,4 квадрат метр хайырланыугъа берилгенди. Жашау журтла къурулушха себеплик этерча  ол ишле бардырылгъан тийреледе суу бла жалчытыу эм суу кетиу инфраструктура проектле тындырыладыла. Андан сора да, регионда Бахсан къауумлу суу барыу ызны къурулушу башланырыкъды, ол эки жылгъа тамамланыргъа тийишлиди. Проектни бардырыугъа 2 миллиард сомдан артыкъ бёлюнюрюкдю.

Тийишли шахар болумланы жарашдырыу андан ары бардырылады. Къабарты-Малкъар Республиканы 100-жыллыгъына Нальчикде 7 жангы сквер, Прохладныйде, Бахсанда, Майскийде эм Тырныауузда жамаут тийрелени тапландырлыкъдыла. Ишле апрельде башланырыкъдыла.

2022 жылда «Къоркъуусуз качестволу жолла» миллет проектни чеклеринде регион магъаналы жолланы 100 километрин ремонт этерге умутлудула. Ишлени кёбю къалмагъанлай, барысы да контрактла бла бегитилгендиле, ахча бла жалчытылыныу 1,5 миллиард сом боллукъду. «Регион, муниципалитетле аралы эм жер-жерли магъаналы автомобиль жолланы айнытыугъа себеплик» федерал проектни чеклеринде 2 жол объект планнга салыннганды: 5,5 километр узунлугъу бла Чегем-2-Булунгу (Тёбен Чегем эм Хушто-Сырт эллени араларында) автомобиль жол эм 7,7 километр узунлугъу бла Нальчик-Наркъала автомобиль жол.

Билим бериу махкемелени къурулушларыны программаларына кёре, озгъан жылны ахырында 1785 жери болгъан 3 жангы мектепни ишлери башланнганды. Аланы хайырланыугъа бериу 2022 жылны ахырына белгиленнгенди. Школла Куба элде, Прохладныйде эм Нарткъалада ишленедиле. Быйыл битеу да бирге 4539 жери болгъан 7 жангы школну къурулушлары башланырыкъды. Билим бериу учрежденияла Нальчик, Май, Бахсан, Прохладный шахарлада эм Псынабо, Красносельское, Сармаково элледе ишленирикдиле.