КъМР-ни Башчысы Казбек Коков КъМР-ни экономиканы айнытыу министри Рахайланы Борис эмда КъМР-ни Айнытыуну корпорациясыны баш директору Чочайланы Ахмат бла ишчи тюбешиу бардыргъанды. Аны кезиуюнде санкцияланы болумунда республикагъа инвестицияла келирча этиуню амаллары эмда тамамланнган эмда алыкъа бардырыла тургъан инвестиция проектлеге себеплик этиуню мадарлары сюзюлгендиле.

 Республиканы оноучусу айныуну баш федерал институтлары бла – Гитче эмда орта предпринимательликни айнытыуну корпорациясы, МСП Банк, КАВКАЗ.РФ бла бирге ишлеуню къыйматын кётюрюрге буюргъанды. Регионнга экономика жаны бла магъаналы инвестиция проектлени жашауда бардыргъан гитче эмда орта предпринимательлеге КъМР-ни Гарантия фонду кредит организацияла бла ишлеринде мындан ары да себеплик этеригини юсюнден айтылгъанды. 

Ушакъны кезиуюнде туризмни къырал иеликде болгъан объектлерин айнытыугъа да энчи эс бурулгъанды. Казбек Коков предприятияланы ишлерине дайым кёз-къулакъ болургъа, ала алгъын алыннган борчланы толтурурларын сураргъа кереклисин эсгертгенди, тийишли буйрукъла да бергенди.                                       

Юсюпланы Галина хазырлагъанды.