10 мартда от тюшюу сынау лабораторияла къуралгъанлы 77 жыл толады. Бюгюнлюкде МЧС-ни сюд-эксперт учрежденияла системасына 78 учреждение киредиле.

  Къабарты-Малкъарда от тюшюу лаборатория КъМАССР-ны МВД-да от тюшюуге къарауулунда 1980 жылда къуралгъанды. 2005 жылда аны мурдорунда «КъМР-да от тюшюуге къажау службаны «Сынау от тюшюу лабораториясы» сюд-эксперт учреждение» (ИПЛ) ишлеп башлагъанды. Анга эки бёлюм киредиле: сюд экспертизала бла от тюшюуге къоркъуусузлукъну жалчытыуда сынау эм излем ишлени бардырыу секторла. Учреждениягъа башчылыкъны Олег Туркинов этеди.

Лабораторияны баш борчу сюдлеге, дознание органлагъа, следовательлеге бла прокурорлагъа от тюшюу бла байламлы болумлада ишлерин бардырыргъа себеплик этиудю. ИПЛ-ны келечилери къыйын болум чыкъгъан жерде жаныу къалайда башланнганын эм аны сылтауларын тохташдырыргъа, протоколну жарашдырыргъа, шагъатлыкъ этген затланы алыргъа болушадыла. Ала тинтиулерин этгенде от тюшгюнчю  дери не болгъанын тохташдырыу бла да кюрешедиле. Андан тышында, лабораторияны специалистлери веществоланы бла материяланы, оборудованияны, конструкцияланы жаныу чыгъарына къоркъуу бергенлерин бла къалгъанларын сынап кёредиле. ИПЛ-ны ишчилери сюд экспертизаланы толтурурча аттестацияны ётедиле.

Жылны аллындан башлап МЧС-ни, МВД-ны буйрукълары бла учрежденияда 80 от тюшюу-техника экспертиза бардырылгъанды. Бу жумушланы тамамларча анда битеу керекли оборудование, лаборатор-излем хазна барды, деп билдиредиле МЧС-ни регионда Баш управлениясыны пресс-службасындан.

Кульчаланы Зульфия.