КъБР-м щIыхь зиIэ и журналист, Урысей Федерацэм, Къэбэрдей-Балъкъэрым щэнхабзэмкIэ щIыхь зиIэ я лэжьакIуэ, жылагъуэ лэжьакIуэ, «Советская молодёжь» газетым и редактор нэхъыщхьэу щыта Къардэн Мухьэмэд псэужамэ, гъатхэпэм и 28-м и ныбжьыр илъэс 70 ирикъунут.
Къардэныр 1954 гъэм Бахъсэн щIыналъэм хыхьэ Зеикъуэ къуажэм къыщалъхуащ. 1976 гъэм Къэбэрдей-Балъкъэр къэрал университетым химиемрэ биологиемкIэ и къудамэр, 1988 гъэм – экономикэ къудамэр, 2000 гъэм Кисловодск экономикэмрэ хабзэмкIэ и институтым юридическэ къудамэр къыщиухащ.
КъБКъУ-м щIэсыху Къардэн Мухьэмэд жылагъуэ лэжьыгъэхэм жыджэру хэтащ. Студпрофкомым щэнхабзэмкIэ и комиссэм и унафэщIт, лъэпкъ къафэхэмкIэ университетым и ансамблым хэтт. Ещанэ курсым щеджэу ар университетым и клубым и унафэщI ящIащ. 70 гъэхэм университетым и клубыр Налшык и щэнхабзэ утыку нэхъыщхьэ дыдэхэм ящыщт. А клубыр Къардэным и нэIэ щыщIэтым щыгъуэщ университетым и къудамэхэр щэнхабзэкIэ, актёр зэфIэкIкIэ, щIэныгъэкIэ, хэлъэткIэ зэпеуэу къыщаублар. Илъэс къэс екIуэкI хъуащ апхуэдэ зэпеуэр. Зэман дэкIри, абы «Студент гъатхэкIэ» еджэ хъуащ. Иджыри илъэс къэс ар йокIуэкI щIалэгъуалэ куэдым я зэфIэкIхэр къызыкъуригъэхыу.
КъыкIэлъыкIуэу, ВЛКСМ-м и Налшык Ленинскэ райкомым и инструктору, обкомым и лектору, обкомым и лекторскэ гупым и унафэщIу лэжьэн щIидзащ. 2015 гъэм и мазаем щегъэжьауэ 2020 гъэм и мазае хъуху КъБР-м и УФСИН-м и деж щыIэ Жылагъуэ советым и унафэщIу щытащ.
Къардэн Мухьэмэд илъэс 35-м щIигъукIэ лэжьащ «Советская молодёжь» газетым и редактор нэхъыщхьэу. 1984 гъэм ВЛКСМ-м и обкомым игъэкIуащ газетым редактору - щэкIуэгъуэм и 1-м Къардэным и Iэр щIэлъу къыдэкIащ газетыр. ИкIи а къулыкъум гурэ псэкIэ пэрытащ дунейм ехыжыху. «СощIэж Мэлбахъуэ Тимборэ къызэрызэупщIар: «Сыт, ухьэзыр улэжьэну?!» жиIэу. «Сыхуейт сеплъыну», - щыжысIэм, «Уемыплъу, кIуэи лажьэ!» къызжиIат», - игу къигъэкIыжт иужькIэ Мухьэмэд. Къардэным газетым и пщIэр иIэтащ, абы къытехуэхэм зыщегъэхъуэжын хуейми егупсысауэ щIэ хилъхьэрт, еджэгъуафIэ ищIырт, нэхъыщхьэращи, щIалэгъуалэм яIэщIэлът газетым и къыдэкIыгъуэхэр. Къардэным къехъулIахэм ящыщ, псалъэм папщIэ, адыгэбзэрэ балъкъэрыбзэкIэ напэкIуэцIхэр абы иIэ зэрыхъуари.
Къардэн Мухьэмэд жиIэу зэрыщытамкIэ, газетым езыри куэдым хуигъэсат: «Редактор нэхъыщхьэм и къулыкъум сыщыпэрыувагъащIэм, корреспондентхэм къатххэм редактор лэжьыгъэ куэду хэслъхьэрт, тхыгъэхэм ткIийуэ сыкIэлъыплъыж си гугъэу. Корреспондентым и тхыгъэр къыщимыцIыхужи къэхъурт, уеблэмэ. Апхуэдэурэ екIуэкIыурэ, махуэ гуэрым лэжьакIуэхэм яхуэшэчыжакъым ар: «Мыпхуэдэу хъунукъым, псалъэ лей ттхын дошынэ, къалэмыр тегушхуауэ къытхуэщтэркъым», - жаIащ. Арати, корреспондентхэм я гупсысэр нэхъыщхьэу къэтлъытэ хъуащ, абыхэм къатххэм дыхэплъэжми, я хъэтIым и гугъу тщIыжакъым», - жиIэжырт.
Къардэн Мухьэмэд къыхуагъэфэщауэ щытащ ВЛКСМ-м и ЦК-м, УФ-м и профсоюзхэм я федерацэм я щIыхь тхылъхэр, УФ-м и Журналистхэм я зэгухьэныгъэм мы IэщIагъэр зиIэхэм я щIыхьыр зэригъэлъапIэ дамыгъэр.
2020 гъэм мазаем и 7-м дунейм ехыжащ Мухьэмэд. Ар гуапэу я гум къинащ и ныбжьэгъухэм, зыдэлэжьахэм, къэзыцIыхуу щыта дэтхэнэми. ЦIыху гуапэу, зэпIэзэрыту, захуагъэм и телъхьэу зи гъащIэр зыхьар зэращымыгъупщэм и щапхъэщ Къардэн Мухьэмэд.
ГУГЪУЭТ Заремэ.
