ХЭКIУЭДА Я ЛЭЖЬЭГЪУХЭМ Я АНЭХЭМ ГУЛЪЫТЭ ХУАЩIУФ-м и Лъэпкъ гвардием и управленэу КъБР-м щыIэм ведомствэм щIэмыт и хъумакIуэ IэнатIэм и лэжьакIуэхэр я къалэн ягъэзащIэу хэкIуэда я ныбжьэгъухэм я анэхэм ехъуэхъуащ ЦIыхубзхэм я махуэмкIэ. IэнатIэм и лIыкIуэхэмрэ Урысей гвардием и управленэу КъБР-м щыIэм и ветеран организацэм и унафэщI, полицэм и полковникыу къулыкъум къыхэкIыжа Хужьокъуэ Русланрэ ехъуэхъуащ милицэм и прапорщик Мысост Артуррэ милицэм и сержант нэхъыщIэ Къандэхъу Алимрэ я анэхэу Мысост Хужьпагуэрэ Къандэхъу Риммэрэ. Хабзэхъумэхэм цIыхубзхэм удз гъэгъахэр IэщIалъхьащ икIи фIыщIэ хуащIащ я гъащIэм емыблэжу цIыхухэр зыхъума, къэралым и шынагъуэншагъэр къызэгъэпэщыным хэлъхьэныгъэшхуэ хуэзыщIа лIыхъужь-хэкупсэхэр зэрагъэсам папщIэ. - Фи къуэхэр зэрыффIэкIуэдар гуауэшхуэщ. ИтIанэми, мы махуэм сыхуейщ фIыщIэ фхуэсщIу сынывэхъуэхъуну, фи гугъуехьхэм, дэIэпыкъуэгъу фыхуэныкъуэмэ, абыхэм щыгъуазэ дыфщIыну. Урысей гвардием и щIыналъэ IуэхущIапIэм и унафэщIхэр сыт щыгъуи хьэзырщ зыкъыфщIагъэкъуэну, - жиIащ ветераным.
БАХЪСЭН Ланэ.
Поделиться: ЧИТАТЬ ТАКЖЕ:
|