Черекле кётюрюлюр кезиуде энергокюч бла жалчытхан объектлеге хата жетмезча аланы энчи контрольда тутаргъа керек болады. Бютюнда бек суу басаргъа эм ырхыла келирге къоркъуулу жерледе. Аны бла байламлы «Россети Северный Кавказ» - «Каббалкэнерго» компанияда энчи комиссия электрокюч ызла бузулмазча, подстанцияла эм башха объектлеге да тийишли халда ишлерча комплекс халда профилактика бардырады. Бюгюнлюкде хата жетерик объектлеге Черек эм Чегем сууланы юсю бла баргъан ток ызла саналадыла. Болсада  башха къоркъуулу жерле да кёпдюле.

Аны бла байламлы  юйрениуле  Лескен сууну  жагъасында да ётгендиле. Бу жол Лескен районну оператив  къауумуна черек кётюрюлген заманда  Анзорей бла Ерокко элледе инфраструктураны батдырса, аны бла   0,4 кВ кюч берген ток ызлагъа заран жетдирсе аварияны кетерирге борч салыннганды. Къыйын болсада энергетикле бирлешип  къысха заманда  жумушларын  тынгылы  толтуралгъандыла.

- Быллай юйрениуле специалистлени сынамларын  кючлеуде иги себеплик этедиле. Энергетикле къайсы тюрлю болумгъа да хазыр боладыла эм жунчумай къысха заманда бузукълукъланы кетередиле,- дейди «Каббалкэнерго» биригиуню баш  инженери Алибек Яганов.

Бу жол юйрениулеге ведомствону эмда жер-жерли самоуправление органланы,  ич ишлени  келечилери эм  къутхарыучула да  къатышхандыла. Саулай алып айтханда,  460 адам  бла 120 энчи техника  къармашхандыла.  

Курданланы Сулейман хазырлагъанды.