Дыгъэгъазэм  и  15-м зи ныбжьыр илъэс 80 ирикъуа, Санкт-Петербург  дэт Академическэ филармонием и оркест­рым и унафэщI икIи и дирижёр нэхъыщхьэ, дуней псом щыцIэрыIуэ ди лъахэгъу,  профессор  Темыркъан  Юрий Хьэту и къуэр ягъэлъэпIащ. Филармонием абы и щIыхькIэ щекIуэкIа «Гъуа­зджэм и утыку» зыфIаща фестивалым Темыркъаным ехъуэхъуну къэ­кIуащ УФ-м и Президент Путин Владимир.

«Си гуапэ дыдэщ дунейпсо макъамэ гъуа­зджэм зи цIэ щыIуа цIыху щэджащэхэр зыщIэта мы унэ лъапIэм сыкъыщIыхьэну. СэркIэ пщIэ лейуэ къызолъытэ абы нобэ зи махуэшхуэр щызыгъэлъапIэ Юрий Хьэту и къуэм сехъуэхъунри, - жиIащ  Президентым. - ЩIэгъэтхъэныгъэ закъуи хэмылъу, мы унэ телъыджэм щызэхахащ дунейпсо мыхьэнэ зиIэ «ва­гъуэшхуэхэм» я макъхэр. Шэч хэмылъу, абыхэм язщ нобэ дгъэлъапIэ цIыхури. Дигуми ди псэми къабгъэдэкIыу уи махуэшхуэмкIэ дынохъуэхъу, Юрий Ха­туевич! Уэ пхуэдэ цIыхухэм я фIыгъэкIэ дэ (иджыпсту сызытепсэлъыхьыр макъа-      мэр зи IэщIагъэу щымыт цIыху къы­зэ­ры­кIуэ­хэращ) гъащIэм ухэзыIэтыкI музыкэм        и ­дуней гъунэншэм дыкъы­щохутэ. Абы и лъагагъымрэ гъунэ зэримыIэмрэ зыхыдощIэ. Уи Iэзагъым псалъэм пхуимыгъэ­загъэ гурыщIэ куухэр щызекIуэ дуней къы­зэIутхыну  Iэмал ­ къыдет.  Абы къыхэкIыу, уи зэфIэкIым и хьэтыр зылъагъу цIыху щэрэ-минхэм, мелуанхэм къабгъэдэкIыу фIыщIэ пхузощI.
Темыркъаныр куэдым хуэIэзэ цIыхущ. Ар икIи егъэджакIуэщ, икIи псапащIэщ, иджыпсту къежьа псалъэщIэ къэбгъэщ­хьэпэмэ, гупыж дахэ зыщI волонтёрхэм  ящыщщ. Абы и фIыгъэкIэ фес­тивалы-щIэ куэд гъуэгу техьащ, иджыпсту екIуэкI­ри ­апхуэдэхэм я щапхъэщ. Абдежи ­къы­щы­мыувыIэу, макъамэм хуэIэзэ ­щIа­­лэгъуалэм защIэзыгъакъуэ грантхэр егъэлажьэ.
Псори зи фIыгъэр Темыркъанращ. Сыту жыпIэмэ, дуней псом щыцIэрыIуэ макъамэгъэIу гупхэм ядэлажьэу щыт- ми, ар сыт щыгъуи иужь итащ ди къэралым и музыкэ ­гъуазджэр зэрыригъэ­фIэкIуэным. Сыт щыгъуи езым и унэ хуэдэу ­къилъытэу, Урысейм ЩIыхь зиIэ         и оркестрым и филармонием щылэ-жьащ. Шэч хэлъкъым, ди «макъамэ унэм» апхуэдэ бысым щIэсыху, ар зыхуей хуэ­зауэ зэ­рыщытынум.
Зэманым дыщриплъэжкIэ, маэстрэм и IэнатIэр илъэс 30 хъуауэ ирихьэкIыу къы­щIокI. Ауэ абы и пэ ита цIыху щэджащэ, дирижёр Мравинскэм а къулыкъур нэхъыбэжрэ зэрихьащ. Дэри гугъэ дахэ диIэщ Темыркъан Юрий дяпэкIи и Iэ­загъым дыщигъэгуфIыкIыу илъэс куэдкIэ тхуэлэжьэну. ФIыщIэ пхузощI!»
Темыркъан Юрий ехъуэхъуну зи гугъу тщIы пшыхьым щыщ лIыкIуэхэри еблэ­гъащ. Абыхэм яхэтахэщ УФ-м Шына­гъуэн­ша­гъэмкIэ и Советым и Секрета­рым и къуэ­дзэ КIуэкIуэ Юрий, КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек, КъБР-м ЦIыхухэм я хуиты­ны­гъэхэмкIэ уполномоченнэу ­КъБР-м щыIэ Зумакулов Борис, Дунейпсо Адыгэ Хасэм и тхьэмадэ  Сэхъуро­къуэ Хьэутий  сымэ.