ЛIЫГЪЭР ЗЫГЪЭУНЭХУАР

(Нарт тхыдэжь)

Уэзырмэдж мэзым щIэтурэ здэкIуэм, плъэри гъэхъунэм зыш ирилъэгъуащ. Шыр лъэхъащ, шыр зейр къыIэщIэлъэгъуакъым.
 – Мыр зейр жыжьэ IукIакъым, и лIыгъэр згъэунэхунщ, – жиIэри Уэзырмэдж мэзым къыхэкIащ, гъэхъунэм ихьэри, шыр шхуэмылакIэкIэ къришэжьащ, лъахъэр ирихри. Шыр зейр мэзым щакIуэ хыхьауэ джабэм кIэрытти, къаплъэри, Уэзырмэдж къилъэгъуащ
 – Уэзырмэдж, мы къызэпщIэр хъункъым, шыр иумышажьэ, – къегуоуащ шыр зейр.
 – Мыбы дэнэ сыкъыщицIыхурэ? – жиIэри игъэщIэгъуащ Уэзырмэдж, арщхьэкIэ шыр иутIыпщыжакъым, гъэхъунэм къикIыжри, и гъуэгу техьэжащ.
Шыр зей щIалэм, мэзым къыхэкIыжри, Уэзырмэдж и лъэужьыр ирихужьащ, пщIэгъуалэм и кIэбдзым телъ дамыгъэм гу лъитати.
Уэзырмэдж и унэ ихьэжри, и пщIэгъуалэри мэзым къыщIиша шыри шэщым щIигъэзэгъащ. И лъэужьыр шыр зей щIалэм къызэрихунум шэч къытрихьэртэкъыми, кIуэри хьэщIэщым щIэтIысхьащ. Пшапэр зэхэуауэ, шыр зей щIалэр къэсащ. Уэзырмэдж щIалэм пежьащ:
 – Еблагъэ, – жиIэри.
 – Себлэгъэнукъым, – еблэгъэн идакъым щIалэм. – Уи пщIэгъуалэр къысхудэш. ЦIыхум дыкъыумыгъащIэ. ПщIэгъуалэр къысхудумышмэ, бэлыхь ухэздзэнщ.
Уэзырмэдж и пщIэгъуалэр шэщым къыщIишри, щIалэм иритащ.
 – Уэзырмэдж лIы бланэщ, жаIэ. Убланэмэ, фызым дамащхьэкIэ пхъэ къахуэхь, уэ шыкIэ пщIэжын щыIэкъым, – жиIэри, щIалэр Уэзырмэдж и пщIэгъуалэм шэсри ежьэжащ.
«И лIыгъэ згъэунэхуащ, си лIыгъи игъэунэхун мурад ищIащи, ищIэм сеплъынщ», – жиIэри Уэзырмэдж хьэщIэщым ихьэжащ. ЩIалэм къытригъэзэнкIэ гугъами, къытригъэзакъым. Зы гъи гъитIи дэкIащ – щIалэм къытригъазэркъым. И гугъэр пщIэгъуалэм хихыжри, Уэзырмэдж тIысыжащ. И дамыгъэр зытелъ пщIэгъуалэр щыфIэкIуэдым, Уэзырмэдж нэгъуэщIыш шэсыжакъым, зекIуэми яхэмыхьэж хъури, и унэ къинэжащ.
И унэ къинэжауэ исурэ, зы гъэри гъитIри кIуауэ, Уэзырмэдж и куэбжэм зы шу къыIухьащ. Шум Уэзырмэдж и пщIэгъуалэр и Iэдэжт.
 – Еблагъэ, – жиIэри шум пежьащ Уэзырмэдж.
 – Себлэгъэнукъым, – жиIащ шум. – Ирикъункъэ фызым дамащхьэкIэ пхъэ къазэрыхуэпхьар? Уи пщIэгъуалэр къыпхуэсшэжащ. Си лъэужьыр нэпхун си гугъа щхьэкIэ, нэпхуакъым. ЗекIуэм уахыхьэжынумэ, пщIэгъуалэр щхьэусыгъуэ умыщI, – жиIэри щIалэр ежьэжащ, пщIэгъуалэр Уэзырмэдж къритыжри.
ЛIым и лIыгъэ згъэунэхунщ, жиIэжакъым Уэзырмэдж абы и ужькIэ.

Тедзэным хуэзыгъэхьэзырар ТАБЫЩ Муратщ.

Поделиться:

ЧИТАТЬ ТАКЖЕ:

19.05.2024 - 09:03

ГУЛЪЫТЭР ЗИIЭ НЫБЖЬЫЩIЭХЭР

 «УхуакIуэ» Къэбэрдей-Балъкъэр колледжымрэ» Автогъуэгу колледжымрэ я студентхэу Прозоровский Александррэ Кизарисов Султанрэ зыхуагъэзащ КъБР-м и УМВД-м и жылагъуэ советым хэт Аттоевэ Дианэ, икIи жр

18.05.2024 - 12:25

МАЗИЩЫМ КЪРИКIУАХЭР

2024 гъэм и япэ мазищым къэралым и щIыналъэхэм промышленнэ продукцэу псори зэхэту къыщIагъэкIам и куэдагъымкIэ Къэбэрдей-Балъкъэрыр нэхъыфIищым яхыхьащ.

18.05.2024 - 09:03

ПХЪЭМЫФЫКЪУЭ ЛЪАПЭ ДЕЖ

Ди япэ итахэм къызэранэкIа хъыбархэр гъащIэм имыпхъэхыжу зэщIэзыкъуэжу бзэ къулейкIэ къезытхэкIыжахэм ящыщщ адыгэ IуэрыIуатэр зэхуэхьэсыжыным ерыщу яужь ита, Къэрэшей-Шэрджэсым щэнхабзэмкIэ щIыхь з

18.05.2024 - 09:03

ЕВРОПЭР НАСЫПЫНШАГЪЭМ КЪЕЗЫГЪЭЛА ЩIАЛИЩ

1986 гъэм Чернобыль къыщыхъуауэ щыта насыпыншагъэм нэхъыбэж хэкIуэдэнут цIыхуищ къудей мыхъуатэмэ.

17.05.2024 - 09:03

ДЭТХЭНЭРИ ДЫХУЭНЫКЪУЭЩ

Ди планетэм тет къэралхэм я нэхъыбэм зы илъэс къэмынэу накъыгъэм и 12-м къыщызэрагъэпэщ хабзэщ «Экологие щIэныгъэ егъэгъуэтыным и махуэ» зыфIаща Iуэхугъуэхэр.