Озгъан ыйыкъда Нальчикни администрациясыны Жаш тёлю политика жаны бла управлениясы «Биринчилени атламлары» биригиу КъМР-ни Жарыкъландырыу эм илму министерствосуну Устазланы усталыкъларын ёсдюрюу жаны бла институтуну малкъар тилден бла адабиятдан лабораториясыны таматасы Къонакъланы Любаны болушлугъу бла шахар школланы бла колледжлени командаларыны араларында «Ана тилингде ангылат!» деген эришиу бардырылгъанды. Ол тёреге айланнганды эмда анга жаш тёлю сюйюп къатышады.

Быйыл бардырылгъаннга Хасанияны, Нальчикни да 8-чи, 23-чю номерли школларыны, «Призвание» медицина колледжни эм «Къурулушчу» окъуу юйню эки командасы къатышхан эдиле. 
Къонакъланы Люба чертгеннге кёре, бу эришиу жаш адамларыбызда ёз тилибизге сейирни къозгъаргъа себеплик этеди. Аны юсю бла ала энтта да бир кере малкъар тилни байлыгъына тюшюнедиле», - дегенди ол. 
Жюриге уа КъМР-ни Жаш тёлюсюню ишлери жаны бла министрини орунбасары Ахметланы Артур да киргенди. Ол да жаш адамлагъа айланып айтхан сёзюнде кеси тилибизни билиу, сыйлау неден да багъалы болгъанын чертгенди. 
Эришиу 6 къауумну араларында ётгенди. Хар команданы да кесини атлары бар эди - «Таулучукъла», «Жулдузла», «Нарт Дебет», «Жулдуз», «Минги тау» эм «Тау къуш». Оюн а экишер команданы араларында бардырылгъанды. Хар командадан бирер адам чыгъып, жюрини столундагъы карточкаладан алып, анда жазылгъан сёзню магъанасын, аны бла бир тамырлы болгъан сёзлени да хайырланмай ангылатыргъа борчлу эди. Жарсыугъа, къызланы бла жашланы араларында кёп сёзню магъанасын билмегенле тюбей эдиле. Сёз ючюн «чанчхы», «фатар», «къадау» дегенчаланы. 
 «Къурулушчу» колледжден жашланы энчи белгилерчады. Ала ана тиллерин бек иги билгенлерин кёргюзтгендиле эм «доммакъгъа» тийишли болгъандыла. «Призвание» колледжни командаларындан а «Жулдузла» онглуракъ эдиле. Ахырында ала 23-чю номерли школну «Акъыллыла» деген командасы бла тюбешип, алагъа хорлатхандыла. Хорлам а бу эришиуде 23 -чю номерли школну келечилерине жетгенди. 
Хорлагъанла дипломла, кубок эм ана тилибизде китапла бла саугъаланнгандыла.
Ол кюн жырчыла Сарбашланы Аскер, Темуккуланы Аминат, «Гордость Кавказа» тепсеу къауум хунерлерин кёргюзтгендиле. 
Нальчикни администрациясыны Жаш тёлю политика жаны бла управлениясыны таматасыны къуллугъун толтургъан Анзор Афашагов да жаш тёлюге айланып, быллай магъаналы жумушлагъа къатыша турургъа чакъыргъанды. 

Таппасханланы Аминат.