Бу кюнледе Элбрус районда Юйюрню жылына аталгъан уллу байрам болгъанды. Ол «Юйюр – насып жылытхан жюрекди» деген ат бла Къулийланы Къайсын атлы Маданият юйде бардырылгъанды.
Бу байрамны энчилиги недеди десегиз – жашауларын мындан 50 жыл алгъа бирге байлагъан юйюрле чакъырылгъандыла. Сыйлы къонакъла сабийлери, туудукълары бла бирге келгенлери уа ингирге бютюнда къууат бергенди.
Жыйылгъанланы Элбрус районну администрациясыны башчысыны къуллугъун толтургъан Сотталаны Къурман алгъышлагъанды. Ол Юйюрню жылы кечирек нек ачылгъанын ангылата, ол алай тынгылы жангыртыу жумушладан сора ишлеп башлагъан Маданият юйде бардырыр ючюн этилгенин белгилегенди. «Бу ариу мекямда биринчи жыйылыу юйюрлени алгъышлау бла байламлы болгъаны уа бютюн магъаналыды. Элбрус районну битеу юйюрлерин да къууанч бла жюрегимден алгъышлайма», –дегенди ол.
Къурман Сейитович Элбрус районда тамамланнган жумушланы юслеринден къысха айтханды. Ала республиканы оноучуларыны хайырындан тамамланнганларын белгилеп, КъМР-ни Башчысы Казбек Коковха, Правительствону таматасы Мусукланы Алийге, министрлеге ыразылыгъын билдиргенди. «Битеу жумушла районну жамауаты, халкъыны ырахат жашауу, ёсюп келген тёлю ючюн тамамланадыла», – дегенди.
Бюгюнлюкде уа республиканы, Элбрус районну да инсанлары энчи аскер операцияда къыралыбызны сейирлерин къоруулагъанларын айтып, Сотталаны Къурман ала жууукъ кезиуде Хорлам бла туугъан журтларына къайтырларын тежегенди.
Ол кюн а байрамгъа Залийханланы Михаилны бла Лейляны, Малкъарланы Исмайылны бла Аслийжанны, Кяров Анатолийни бла Лидияны, Ахматланы Сейфутдинни бла Зухраны, Мырзаланы Идрисни бла Розаны, Герийланы Хакимни бла Тамараны, Эндрейланы Салихни бла Фатиматны, Гайыланы Махтини бла Зухураны, Этезланы Созарбайны бла Назифаны, Юсюпланы Хасанны бла Зухураны, Этезланы Аликни бла Разиятны, Къудайланы Батталны бла Захираны, Бёзюланы Музафарны бла Мафтуланы юйюрлери чакъырылгъандыла.
Жылла озгъанларына, кёп сынауладан ётерге тюшгенине да къарамай, сахнагъа чыкъгъан таматала бир бирге хурметни, намысны, кертиликни тас этмегенлерин кёргюзтгендиле. Ала халкъны адет-тёрелерине, миллет культурагъа кертиликни юлгюсюдюле деп, таукел айтыргъа боллукъду.
«Алтын юйюрлеге» Сотталаны Къурман димломла эм эсде къаллыкъ саугъала бергенди. «Жууукъланы, сабийлени, туудукъланы арасында кёп жылланы намысда жашагъыз», – деп энтта бир кере алгъышлагъанды.
Байрамгъа жыйылгъанлагъа уа уллу концерт да къуралгъанды. Юйюрлени фахмулу жырчыбыз Газайланы Алим, «Балкария», «Терские казаки» къырал ансамбльлени артистлери, белгили къобузчу Тимур Лосанов, районну жырчылары бла тепсеу ансамбльлери алгъышлагъандыла.
Тикаланы Фатима.
Суратланы Хаджиланы
Жамал алгъанды.
