Жанхотияны мектебине жумуш бла келгенимде, директорну юйретиу иш жаны бла орунбасары Мызыланы Надя китапхананы жокъларымы тилейди. «Аны таматасы бла да таныш, сокъуранмазса», – дейди.
Киргенимде, тизгинликге, хар зат да тап жарашдырылгъанына эс бурама. Ары келгеннге олтуруп, китап окъургъа, журналлагъа, газетлеге къараргъа да онгла къуралыпдыла. Манга китапхананы «иеси» – Жаболаны Зайнаф, Хайырланы Хызырны къызы, жарыкъ тюбейди. Экибиз да ушакъ эте келгенибизде, ол гитчелигинден окъуна китапла окъургъа бек сюйгенин, школда уа математикагъа хунери ачыкъланнганын билгенме. Андан окъуна болур эди, усталыкъны сайларгъа жетгенде, бухгалтерликге кёлю тартханы да.
Алай жашауда хар не да биз сюйгенча болуп къалмайды. Эрге чыгъып, Лашкутагъа кёчгенинде, анда аны окъуууна келишген иш табылмайды. Элде библиотекачы болмагъаны себепли, Зайнафны ары чакъырадыла. Алгъа Лашкутаны орта школуну китапханасында ишлегенди, энди – Жанхотияны мектебинде.
Былай къарагъанда, иши бек тынчды дерчады, алай кёл салып кюрешгеннге жумушла табыладыла. Окъуучудан китапны алып, анга жангысын берген, айхай да, аланы жаланда бир кесегиди. Ишни башы – сабийлеге насийхатлыкъ этиудю, ариу къылыкъгъа юйретиудю. Дагъыда устазлагъа, окъуучулагъа да дерслеге хазырланыргъа болушууду. Зайнаф ол жумушланы уллу кёл салып тындырады.
Классдан тышында дерслени, байрамланы, тюбешиулени сценарийлерин къураугъа да ол тири къатышады. Ол жаны бла аны хунери уллуду. Поэзия, музыка, искусство анга бек жууукъдула.
– Кюн сайын телевизорда, компьютерде, телефонда осал ишлени, магъанасыз, ётюрюк затланы кёрюп тургъан сабийлеге Александр Пушкинни, Николай Гумилёвну, Анна Ахматованы, Михаил Лермонтовну, Сергей Есенинни, Александр Блокну чыгъармаларына табындыргъан бек къыйынды. Анга да къарамай, окъуучула аланы сезимлерин тюзетирик, сагъышландырлыкъ эмда тюз оюмла этерге юйретирик чыгъармаланы окъургъа сюерча, билимли, ётгюр эмда халал жюрекли болурларына себеплик этерге кюрешеме, – дейди Зайнаф.
Бир-бирледе адам сайлагъан усталыгъына сокъураннган да этеди. Аллай кезиуюнде аллына келген сабийлени насыпдан толу, жарыгъан кёзчюклерин кёрсе, Зайнафны арсарлыгъы олсагъат кетеди. Окъуучуланы конференциялары, адабият ингирлери, викториналары, оюнлары, конкурслары, китап кёрмючлери, билимлилени эришиулери – бу тюрлю ишлени бардырыу, сёзсюз, мектепчилени билимлерин кётюрюрге уллу къошумчулукъду.
– Арт жыллада жангы китапла китапханагъа биз сюйгенча терк-терк тюшмейдиле. Ол а бек аманды. Нек дегенде бизге дайым жюрюп тургъанла жангы чыгъармаланы излейдиле, – дейди китапханачы.
Аны къууандыргъан шартла да бардыла. Сёз ючюн, арт жыллада кесибизни жазыучуларыбызны чыгъармаларын сабийле сейир этип окъугъанларын ёхтемленип айтады ол. «Мечиланы Кязимни, Къулийланы Къайсынны, Зумакъулланы Танзиляны, Бабаланы Ибрагимни, Толгъурланы Зейтунну, Моттайланы Светлананы, Созайланы Ахматны, Мусукаланы Сакинатны, Шауаланы Хасанны, Додуланы Аскерни бегирек жаратадыла. Кёчгюнчюлюкге аталгъан чыгъармаланы да абаданла, сабийле да окъургъа ёчдюле», – дейди ушакъ нёгерим.
Зайнаф ана тилибизни айныуу ючюн да къайгъырады. Кеси да республикада бардырылгъан «Ана тилим, жаным-тиним» деген конкурсха да тири къатышады. Ма ол эмда ишинде болдургъан башха жетишимлери ючюн да аны «Къабарты-Малкъар Республиканы билим бериуюню сыйлы ишчиси» деген атха тийишли кёргендиле.
Огъурлу, ариу сёзлю, сабыр тиширыу Жаболаны Сюлемен бла жаш бла къыз ёсдюргендиле. Ала, бийик билим алып, бирер жерде бет жарыкълы урунадыла.
Холаланы Марзият
