Былтыр Къабарты-Малкъар къырал аграр университетде, «Строитель» эм  Эльхотов колледжледе окъугъан 87 чакълы студент «Россети Северный Кавказ» – «Каббалкэнерго» биригиуде сынамларын ёсдюрюрге онг тапхандыла. Аланы арасында  кеслерин айырмалы кёргюзталгъан тогъузаулан  электрокюч бла байламлы  бёлюмде  ишге орналгъандыла.

Тамблагъы энергетиклеге тамата коллегалары эм биринчи усталыкъларыны мурдорундан эм магъаналы шартларындан   билдиргендиле. Ол санда къоркъуусузлукъну техникасы эм урунууну къоруулауну жорукълары бла шагъырей этгендиле.   Ызы сынамлы специалистле  энергообъектледе  не тюрлю жумушла тамамланнганларын кёргюзтгендиле.  

- Иги кадрла болмай абонентлени ток бла тынгылы жалчытырча проектни  жашауда бардырыргъа онг жокъду. Ол себепден  биригиуге не къадар кёп иш кёллю,  билимли  жаш специалист келсе да бек ыразыбыз,- дегенди  «Каббалкэнерго» биригиуню таматасы Муртаз Каров.

Эсге сала айтсакъ, быйыл да ток бла жалчытхан биригиуде  производство эм диплом практикаларын  80 жууукъ жаш адам  ётерикдиле.