Гъуэгу хозяйствэмкIэ «Кавказ» федеральнэ IуэхущIапIэм къызэрыхилъхьауэ, 2024 гъэм къриубыдэу, Налшык къалэ Идар Темрыкъуэ и цIэр зезыхьэ и уэрамым и машинэ зэблэкIыпIэу 4-м щыщу Р-217 «Кавказ» федеральнэ автомобиль зекIуапIэм и 450-нэ километрым къыщыщIэдзауэ 455-нэм нэсыр къызыхуэтышэу зэрагъэпэщыжынущ. А Iыхьэр хохьэ Налшык и кхъухьлъатэ тедзапIэм хуэзышэм.
Зи гугъу тщIы щIыпIэм автомашинэу щызэблэкIым я бжыгъэм иужьрей илъэсхэм хэпщIыкIыу хэхъуащ. КъызэрабжамкIэ, жэщ-махуэм къриубыдэу ахэр мин 30-м щIегъу. Абы къыхэкIыуи, гъуэгум телъа асфальтым и щхьэфэр щIыпIэ-щIыпIэкIэрэ щетIысэхащ, языныкъуэхэм деж щызэгуэкIащ, вагъэмбэкъу теплъэ иIэ хъуащ.
IэщIагъэлIхэм къызэралъытэмкIэ, гъуэгум зи гугъу тщIа и зэблэкIыпIиплIыр, иджырей мардэхэм къитIасэу зэрагъэзэхуэжа иужькIэ, нэхъ щызекIуэгъуафIи шынагъуэншагъэм нэхъ тещIыхьауи хъунущ.
Лэжьыгъэхэм хыхьэу, гъуэгуухуэхэм япэщIыкIэ машинэ зекIуапIэм телъа асфальт-бетоныр трагъэкъэбзыкIыжынущ. КIэлъыкIуэ лъэбакъуэу, «регенерацэ щIыIэпс» («холодная регенерация») зыфIаща IэмалыщIэм хуэкIуэу, тратхъунщIыкIар ресайклер IэмэпсымэщIэмкIэ цIыкIу-цIыкIуххэу яущыкъунурэ, кIуэры-
кIуэм тету хагъахъуэ битум эмульсэрэ цементкIэ зрагъэпцIыжынущ. Апхуэдэ щIыкIэм тету къаIэрыхьар автомобиль зекIуапIэм тракIэжынущ. ЗэрагъэунэхуамкIи, а IэмалыщIэм гъуэгур нэхъ быдэ ищIынущ.
КIэлъыкIуэу, автомобиль зекIуапIэм иджыри асфальт «уэншэкущIэу» тIу трабзэнущ - зыузэху япэреймрэ мывэкIэщхърэ мастикэкIэ зэхэпщамрэ. ЕтIуанэр, зэрыжаIэмкIэ, телэжьыкIыгъуейщ, шэрхъхэри темыцIэнтхъукIыу нэхъ зыубыдщ.
IэщIагъэлIхэм гъуэгу зэхэкIыпIэхэми лэжьыгъэ пыухыкIахэр щрагъэкIуэкIынущ: жьы хъуа щхьэфэр тратхъунщIыкIыжынурэ ищхьэкIэ зи гугъу тщIа Iэмалхэм языхэзымкIэ асфальт тIуащIи тралъхьэжынущ. Инженер лэжьыгъэхэм хыхьэу, автомобиль зекIуапIэм и бгъуитIымкIи Iулъ мывэхэр зэрахъуэкIынурэ Iуагъэбыдыхьыжынущ, гъуэгум и зэблэжыпIэхэр куэдрэ темылэжьыкIыж термопластик ткIуаткIуэкIэ хагъэунэхукIынущ.
Лэжьыгъэхэр щрагъэкIуэкIкIэ, гъуэгум зи гугъу тщIа и Iыхьэм и лъэныкъуитIми, чэзу-чэзукIэрэ, машинэ зэблэкIыпIэу зырыз къыхуагъэнэнущ.
Iуэхум ирагъэхьыну зэманым къриубыдэу машинэхэр зэтримыхьэн папщIэ, гъуэгу хозяйствэмкIэ «Кавказ» федеральнэ IуэхущIапIэм щылажьэхэм мы щIыпIэр зи зекIуапIэхэр къыхуреджэ нэгъуэщI «лъагъуэхэри» Iэгъуэблагъэм щыIэнкIэ зэрыхъунум егупсысыну.
БЭРАУ Бышэ.