КъБР-м и Iэтащхьэ КIуэкIуэ Казбек Терроризмэм ебэнынымкIэ зэкъуэтыныгъэм и махуэм социальнэ сетым щиIэ и напэкIуэцIымкIэ терактхэм хэкIуэдахэм я благъэхэм захуигъэзащ.
«Урысейми дуней псоми я тхыдэм къыхэна насыпыншагъэ махуэм аргуэру ди нэгу къыщIегъэхьэж 2004 гъэм и бжьыхьэм къэхъуа Iуэхугъуэ шынагъуэр, зихуэдэ щымыIэ гущIэгъуншагъэ терактым и зэранкIэ Беслъэн школым сабийхэр, абыхэм я адэ-анэхэр, егъэджэкIуахэр зэрыщыхэкIуэдауэ щытар.
Иджыри зэ а махуэм дигуми ди псэми къабгъэдэкIыу дахуогузавэ Урысейм и щIыналъэ зэмылIэужьыгъуэхэм щекIуэкIа террорист щIэпхъаджагъэхэм зи благъэ-Iыхьлыхэр хэкIуэдахэм, абыхэм я гуауэр, я хэщIыныгъэр зыхыдощIэ.
Апхуэдэ гущIэгъуншагъэ, цIыхугъэншагъэ щIэпхъаджагъэхэр пхуэухеижынукъым икIи пхуэгъэгъуну-къым.
Нобэ ди къэралыр аргуэру пэщIэтщ терроризмэм. Дэ ди къалэнщ ди къару псори етхьэлIэу терроризмэмрэ экстремизмэмрэ дебэныну, дызэкъуэту жылагъуэмрэ цIыхухэмрэ я шынагъуэншагъэр къызэдгъэпэщыну, ди лъэпкъым мамырыгъэ гъащIэмкIэ иIэ хуитыныгъэр тхъумэну.
Шэч къытесхьэркъым, дызэкъуэтмэ, сыт хуэдэ гугъуехьми дызэрыпэлъэщыфынум, къызэрытхуэдалъэ шынагъуэ псоми хуэфэщэн жэуап зэреттыфынум», - щыжеIэ тхыгъэм.
