|
МардэщIэхэм тоувэ
22 августа, 2023 - 11:05
ЗэхъуэкIыныгъэхэр щыкуэдщ ди гъащIэм. Апхуэдэу мы гъэм фокIадэм и 1-м къыщыщIэдзауэ мардэщIэхэм тоувэ къэралым щылажьэ спорт школхэр. Ахэр егъэджэныгъэ щызэфIах IуэхущIапIэхэм хуагъэдэнущ, сабийхэм ядэлажьэ гъэсакIуэхэр, тренерхэр педагогикэ IэщIагъэлIу къалъытэнущ. А IуэхугъуэщIэхэм ятеухуауэ федеральнэ хабзэхэм халъхьа зэхъуэкIыныгъэхэр иджыблагъэ хэIущIыIу ящIащ.
А Iуэху бгъэдыхьэкIэщIэм фIы куэд кърикIуэну хуагъэфащэ. Апхуэдэу педагогикэ лэжьакIуэу дяпэкIэ къалъытэну тренерхэм школ егъэджакIуэхэм яIэ хабзэ социальнэ шэсыпIэхэр ягъуэтынущ: я улахуэм хэхъуэнущ, илъэс къэс хухах зыгъэпсэ- хугъуэ зэманыр нэхъыбэ хъунущ, аттестацэхэм нэхъ лъэпощхьэпоуншэу пхыкIынущ. Къэрал унафэщIхэм зэрыжаIэмкIэ, спортым дихьэх ныбжьыщIэхэми я Iуэхур нэхъ дэкIынущ, апхуэдэу хъумэ. ЗыщагъасэкIэ, нэхъ IэмалыфIхэр ягъуэтынущ, лэжьыгъэр къызэрызэгъэпэща хабзэхэри ефIэкIуэнущ. Абыхэм ятещIыхьа зэхъуэкIыныгъэхэр зэрыт, Iуэху зехьэкIэщIэхэр щызэпкърыха дэфтэрищэхэр къащтащ.
КъинэмыщIауэ, IуэхугъуэщIэхэр ятещIыхьауэ щытынущ бжыгъэр зи лъабжьэ технологие пэрытхэм. Абы зэпищIэнущ къэралым и щIыналъэхэм щыIэ апхуэдэ IэухущIапIэ псори, дэтхэнэми щекIуэкI лэжьыгъэри IэнатIэм пэрыт IэщIагъэлIхэм ябгъэдэлъ зэфIэкIри наIуэ къищIу. Аращи, Iэмал ягъуэтынущ спорт школ къэси, абы щылажьэ дэтхэнэ тренерми я лэжьыгъэр, абы кърикIуэхэмрэ къит хъерхэмрэ ялъагъужыну. Зэрыщыту къапщтэмэ, сабий-ныбжьыщIэ спорт IэнатIэм иIэ щытыкIэм, абы къэралым зэрызыщиужьымрэ Iуэхум хэлъ лъэпощхьэпохэмрэ укIэлъыплъыфынущ, нэхъ тыншу ебгъэфIэкIуэфынущ.
Спортым, физкультурэм, егъэджэныгъэм ехьэлIа хабзэхэм зэхъуэкIыныгъэхэр щыхалъхьар иджыблагъэми, къэралым щылажьэ спорт школхэм я IэщIагъэлIхэм ящыщ куэдым нэхъ пасэу ягъуэтащ «педагог-тренер» цIэр. Нобэ ди Урысейм Федерацэм щыIэ спорт зэгухьэныгъэу мини 5-м щIигъум я нэIэм щIэтщ IуэхущIапIэ мин 53-м нэс. Абыхэм йокIуалIэ спортым дихьэх цIыху мелуани 3-м щIигъу, гъэсакIуэхэу мин 90-м щIигъу щолажьэ. Ахэр егъэджакIуэ IэщIагъэлIу ялъытэ. Спорт IуэхущIапIэхэм ящыщ куэдми егъэджэныгъэ IэнатIэу зэрыщытым щыхьэт техъуэ лицензэхэр зрагъэгъуэтащ.
Иджы, хабзэхэм халъхьа зэхъуэкIыныгъэхэр къэплъытэмэ, щIэблэр спортымрэ физкультурэмрэ нэхъри дегъэхьэхыным, ныбжьыщIэхэр гъащIэ узыншэм хуэущии-ным ехьэлIа лэжьыгъэ псори нэхъ тэрэзу зэфIахынущ. Я Iуэхур нэхъ дэкIынущ мардэщIэхэм теувэ IуэхущIапIэхэми абыхэм щылажьэ IэщIагъэлIхэми. А псори зыхуэунэтIыжар щIэблэ узыншэ ди къэралым къитэджэнырщ.
КЪАРДЭН Маритэ.
|
15.05.2024 - 09:32 Музыкэ театрым накъыгъэм и 7-м концерт гукъинэж щитащ Урысей Федерацэм, Къэбэрдей-Балъкъэр, Къэрэшей-Шэрджэс республикэхэм щIыхь зиIэ я артист, оперэ уэрэджыIакIуэ цIэрыIуэ, Музыкэ театрым и солист |
|
15.05.2024 - 09:31 Бахъсэн щIыналъэм хиубыдэ къуажэхэм фэеплъ пэкIухэр, зэIущIэхэр, зэхуэсхэр щрагъэкIуэкIащ Хэку зауэшхуэм ТекIуэныгъэр къызэрыщытхьрэ илъэс 79-рэ щрикъум ирихьэлIэу. |
|
15.05.2024 - 09:29 1941 - 1945 гъэхэм екIуэкIа Хэку зауэшхуэм ди къэралым ТекIуэныгъэ Иныр къызэрыщихьрэ илъэс 79-рэ зэрырикъур дэнэкIи Iэтауэ щагъэлъэпIащ. |
|
15.05.2024 - 09:27 Прохладнэ районым и полицейхэмрэ жылагъуэ лэжьакIуэхэмрэ Прохладнэ къалэм щыпсэу, Хэку зауэшхуэм и ветеранхэу Ерохинэ Аннэ, Шайн Владимир, Головин Владимир сымэ я деж щыIащ икIи ТекIуэныгъэм и маху |
|
15.05.2024 - 09:25 Хэку зауэшхуэр зымылъэгъуа щIэблэр абы теухуа уэрэдхэм, усэ-хэм дыщедаIуэкIэ, фильм дыщеплъыжкIэ, дэтхэнэми и щIыфэр егъэтхытх, гущIэгъуншагъэрэ залымыгъэу зэрахьамрэ зыхэтщIэу. |
|