Республиканы башха жерлериндеча,  Чегем районда да «Сабийни школгъа хазырла»  деген чакъырыу бла тёрели жандауурлукъ акция бардырыллыкъды.  Аны чеклеринде  муниципалитетде къолайсыз  юйюрлеге тийишли болушлукъ тапдырылады. Бу жол  аллай Донецк бла Луганск халкъ республикаладан окъуучулагъа себеплик этилликди.  

Жыл сайын жандауурлукъ ишге жер-жерли самоуправленияны, предприятияланы, жаш тёлю организацияланы, бизнесни келечилери,  устазла эм башха уллу кёллю болмагъан инсанла къатышадыла. Аланы санлары кёпден-кёп бола баргъаны да къууандырады.

Акция  25 августда ётерикди. Аны адреси:  Чегем шахар,  Бахсан шоссе 24-чю юй.   

Аны бла бирге бу кюнледе Чегем районну делегатлары   «Радуга» сабий реабилитация арада солугъан эм саулукъларын кючлеген Херсон областьдан сабийлени жокълагъандыла. 

Алагъа саугъагъа татлы ашарыкъла, канцеляр керекле эм башха затла да келтиргендиле.   Чегемчиле къачхынчыгъа тюшгенлени болумларын иги ангылайдыла, ол себепден  бу жол биргелерине артистлени эм  аниматорланы да келтиргендиле. Тюбешиу жарыкъ той-оюн халда ётгенди, къонакъланы да бираз кёзлери жарыгъанды.