Къэбэрдей-Балъкъэр гуманитар-техникэ колледжым иджыблагъэ зэIущIэ щекIуэкIащ мэкъумэш IэнатIэм епха щIэныгъэмрэ есэныгъэхэмрэ зэщIыгъуу зегъэужьыным хуэунэтIа центр къызэгъэпэщыным теухуауэ. «Iуащхьэмахуэ» зыфIаща кластерым хыхьэу зэгурыIуэныгъэ зэраухылIэнущ икIи щызэдэлэжьэнущ КъБР-м Егъэджэныгъэмрэ щIэныгъэмкIэ и министерствэр, Хьэмдэхъу Башир и цIэр зезыхьэ Къэбэрдей-Балъкъэр мэкъумэш-промышленнэ колледжыр, еджапIэр къэзыухахэм лэжьыгъэ къезытыну IуэхущIапIэхэр.

ЗэIущIэм хэтащ КъБР-м егъэджэныгъэмрэ щIэныгъэмкIэ и министр Езауэ Анзор, КъБР-м лэжьыгъэмрэ жылагъуэр социальнэу хъумэнымкIэ и министр Асанов Алим, щIыналъэм ит колледжхэм я унафэщIхэр, КъБР-м егъэджэныгъэ IэнатIэр щызезыгъакIуэ къулыкъущIапIэхэм я IэщIагъэлIхэр, мэкъумэш IуэхущIапIэхэм я лIыкIуэхэр.
Къэбэрдей-Балъкъэрыр «IэщIагъэрылажьэ» къэралпсо пэхуэщIэм и зэрыхыхьэрэ куэд щIакъым. Фигу къэдгъэкIыжынщи, абы ипкъ иткIэ ирагъэкIуэкIа грант зэхьэзэхуэм Хьэмдэхъу Башир и цIэр зезыхьэ Къэбэрдей-Балъкъэр мэкъумэш-промышленнэ колледжыр щытекIуащ. Грантым кърикIуа сом мелуани 100-мкIэ еджапIэм дэт техникэр зэрыщыту къагъэщIэрэщIыжынущ, унэлъащIэри зэрахъуэкIынущ. ПэхуэщIэр хуэгъэзащ еджапIэр къэзыух ныбжьыщIэхэм я IэщIагъэмкIэ лэжьыгъэ егъэгъуэтыным, апхуэдэ Iэмал къезытыну IуэхущIапIэхэм япыщIа хъуным. Апхуэдэу колледжхэр къэзыух ныбжьыщIэхэр IэщIагъэм хуэшэрыуэ хъун, я есэныгъэхэр зрагъэгъуэта щIэныгъэм пэджэжу, абыкIэ IэнатIэр ирагъэфIакIуэу гъэпсын хуейуэ пэхуэщIэм къегъэув. Мэкъумэш IэнатIэм пыщIауэ къызэрагъэпэщ кластерым еджэныгъэм епха Iуэхугъуэхэр зэпымыууэ щекIуэкIынущ, ауэ абы къыдэкIуэу практикэ лэжьыгъэхэри къыхалъхьэнущ. Кластерыр зэрылэжьэну программэм еджэныгъэмрэ ныбжьыщIэхэм IэнатIэ яхуэхъунухэмрэ зэрепх, зыр адрейм и лъэбакъуэу зэрешалIэ.
«IэщIагъэ щызрагъэгъуэт IуэхущIапIэхэр щIыналъэ экономикэм гуэх имыIэу епхащ. ЦIыхухэм щIэныгъэ етыным къыдэкIуэу, лэжьапIэкIэ къызэгъэпэщынри ди къалэнхэм къыхыхьэу хуожьэ. Дгъэхьэзыр IэщIагъэрылажьэхэр тфIэмыкIуэдыжын, щхьэусыгъуэ зэмылIэужьыгъуэхэм къахэкIыу нэгъуэщI щIыналъэм мыкIуэн папщIэ, пэхуэщIэм гулъытэ хэха хуещI абыхэм IэнатIэ къезытыну IуэхущIапIэхэр къэгъуэтыным. Къэралым абы мылъку хелъхьэ, экономикэр щIыналъэ пыухыкIам зэтес зэрищIынум шэч къытрихьэркъыми», – жиIащ Езауэ Анзор.
Асанов Алим зэрыжиIамкIэ, зэгурыIуэныгъэм и фIыгъэкIэ лэжьыгъэр къэгъуэтыныр нэхъ тынш хъунущ, ужьыхыу хуежьа языныкъуэ IэнатIэхэми заужьыжыну Iэмал хъарзынэхэр щыIэнущ.
Лъэныкъуэхэм зэращIылIа зэгурыIуэныгъэм Iэ щыщIадза махуэм щегъэжьауэ къару егъуэт икIи ар 2026 гъэ пщIондэ зэпыу имыIэу лэжьэнущ.