КъМР-ни Транспорт эмда жол мюлк министерствосундан билдиргенлерича, Элбрус элде «Къоркъуусуз эм качестволу автомобиль жолла» миллет проектге кёре  Мусука улу,  Школьная эм Бук орамла мардалагъа келиширча болгъандыла. Саулай алып айтханда, тынгылы ремонт ишле 1,3 километр  чакълы бирде баргъандыла. 

  
Орамла элчилеге болмагъанча магъаналыдыла. Алада мектеп, администрацияны, полицияны юйлери, амбулатория, сабий сад  эм башха социал   объектле орналадыла.

Подряд организация салыннган борчну тынгылы толтургъанды. Ол санда жолну мурдорун кючлегенди,  жанларын тапландыргъанды, жангыдан асфальт жайгъанды, жорукъланы билдирген белгиле эм ызла да салгъанды. 

Комиссия этилген жумушлагъа бюсюрегенди. Аны чеклеринде жолну кенглигин, асфальтны къалынлыгъын, къынгырлыгъын эм башха шартларын да мардалагъа келишгенлери бла къалгъанларын  тинтгенди.  Экспертизаны кезиуюнде жангыдан тамамларча   бир тюрлю бузукълукъ ачыкъланмагъанды.