Дзюдо

Дзэм къулыкъу щызыщIэхэм дзюдомкIэ я дунейпсо чемпионат Доминикан Республикэм щекIуэкIащ иджыблагъэ. Абы хэтащ Урысейм щIыхь зиIэ и тренер Джэданэ Залым и гъэсэн Мурзабеков Ильяс.

Ди хэкуэгъу щIалэм хузэфIэкIащ медалитI - зы дыщэрэ дыжьынрэ - къихьын. КъыпэщIэтахэм сыт и лъэныкъуэкIи - къарукIи IэмалшыгъэкIи - куэдкIэ ефIэкIыу Ильяс и ехъулIэныгъэм хуэкIуащ.

Ди спортсмен хахуэм къыхузэрагъэпэща пэкIум къыщыпсалъэу Къэбэрдей-Балъкъэрым спортымкIэ и министрым и къуэдзэ Хэжь Заур жиIащ: «Дэ икъукIэ ди фIэщ мэхъу дызыхуэкIуэ зэманым абы иджыри текIуэныгъэ нэхъ иныжхэмкIэ дызэригъэгуфIэнур».

ЗыгъэлъэпIэну, Iэтауэ и унэм кърагъэблэгъэжыну къекIуэлIа псоми фIыщIэ яхуищIащ щIалэм икIи ди къэралым и гимныр ди спортсменхэм я щIыхькIэ хамэ къэрал утыкухэм кIэщI-кIэщIурэ щыIу зэрыхъум, езыми а Iуэхум хэлъхьэныгъэ зэрыхуищIам и гур зэрыхигъахъуэр, мыпхуэдэ зэпеуэ дахэхэр политикхэм фаджэ ящIу къызэрилъытэр жиIащ.