Билдиргенибизча, тёрт кюнню ичинде бизни республикада «Профессионалла-2023» деген регионла аралы эришиуле баргьандыла. Озгъан байрым кюн  ол жетишимли бошалгъанды эмда къууанчлы халда  Нальчикде  Сабийлени эмда жаш тёлюню республикалы юйюнде жабылгьанды.

«Промышленный терек бахчачылыкъ» жаны бла регионла аралы битеуроссей чемпионатда биринчи жерге бизни жерлешибиз чыкъгъанды. Ол Урван районда Б.Г.Хамдохов  атлы  Къабарты-Малкъар  агропромышленный колледжни студенти Владислав Маировду. 
Хорламы бла жашны КъМР-ни  жарыкъландырыу эмда илму министри Анзор Езаов алгъышлагъанды, сертификат  эм сыйлы саугъа да бергенди. Сертификатлагъа уа чемпионатха къатышхан башхала да тийишли болгъандыла. 
«Профессионалла» къымылдауну арасын айнытыу жаны бла эксперти, бёлюмню таматасы Михаил Гайдаев, Москвадан келип, чемпионат къалай баргъанына къарагъанды эмда аны къуралыу халын бек жаратханды. «Бу эришиулеге мындан ары бютюн  аслам жаш адам къатышырыгъына, жетишимлиле андан да кёп боллукъларына ийнанама. Дагъыда бу колледжде  окъугъанланы усталыкълагъа бийик даражада хазырлагьанларын  да белгилерге сюеме. Сау болугъуз. Келир жыл  да чемпионат мында бардырыллыгъына ишексизме», – дегенди  къонакъ.
Чемпионатха къатышханланы дагъыда башхала да алгъышлагъандыла.
Сабийлени эмда жаш тёлюню чыгъармачылыкъларыны республикалы арасына жюрюп, жырларгъа бла тепсерге юйреннген къызла бла жашла, той-оюн къауумла да чемпионатны къууанчлы жабылыуу эсде къалырча да этгендиле.

Холаланы Марзият.